Amirê Ewlehiyê yê Emniyeta Şirnexê Şuayîp Ogdur, dema Hevşaredarên Cizîrê Guler Yerebasan û Abdurrahîm Durmuş dixwestin tev li sempozyuma Serokê Giştî yê PDK’’ê Mesûd Barzanî beşdar bûbû  bibin, asteng kir û gef lê xwar. Rêxistina Partiya Wekhevî û Demokrasiyê ya Gelan (DEM Partî) a Cizîrê têkildarî gefxwarinê daxuyanî da. Daxuyanî, li pêşiya avahiya partiyê hat dayin. Nûnerên partiyên siyasî, rêxistinên girseyî yên demokratîk û gelek kes tev li bûn. 

 

Hevseroka DEM Partiyê ya Şirnexê Taybet Bîlgî di axaftina xwe de pêvajo bi bîr xist û got ku li Şirnexê aqilekî çareseriyê naxwaze di dewrê de ye. Taybet Bîlgî, got ku gelê Cizîrê xwedî li îradeya xwe derketiye û dê têkoşîna wan a li dijî aqilê dijî pêvajoyê bidome. 

 

‘EM QEBÛL NAKIN’

 

Hevseroka DEM Partiyê ya Cizîrê Fîlîz Acu jî bûyer bi bîr xist û got ku gelê Cizîrê bertek nîşanî helwesta polîs daye û hevşaredaran jî piştî protestokirina êrişê ji wir çûne. Fîlîz Acuyê wiha domand: “Salên dirêj e ku walîtî û hêzên emniyetê yên Şirnexê zextekî giran dikin. Ev zimanê hov ê kesên hatine tayînkirin li dijî kesên gel ew hilbijartine, ev zimanê tunehesibandinê ji bo wê ye ku îradeya gel nebînayî nîşan bide û em vî zimanî qebûl nakin.” 

 

'DIVÊ BERPIRSYAR HESABÊ BIDIN’

 

Di berdewamê de Fîlîz Acuyê bi lêv kir ku ew ê li dijî êrişên ser îradeya gel qebûl nekin û wiha axivî: “Li navendê têgehên weke ‘pêvajoya nû’, ‘serdema nû’, ‘zimanê nerm’ û hwd tên bikaranîn lê pratîka li Şirnexê berevajî vê ye. Ev helweata ku îradeya xelkê herêmê jinedîtî ve tê, yên şaredariyan weke dijmin nîşan didin, yê ku hilbijartiyan bi hinceta ewlehiyê li derve dihêle, ne parçeyeke vê pêvajoyê ye. Berevajî vê, hînbûneke dewletê ya pêşiya pêvajoyê digire ye. Heta ku ev zîhniyet neguhere, dê bawerî û hêviya civakê jî çênebe. Em li vir careke din dibêjin; walî, qeymeqam û rayedarên emniyetê nikarin sînorên hiqûqê ji wan re xêz kiriye derbas bikin. Divê ev helwesta li dijî hevşaredarên gel tavilê bê bidawîkirin. Divê der heqê van bûyeran tevan de lêpirsîna îdarî were destpêkirin û ji berpirsyaran hesab were pirsîn.” 

 

'EM Ê HETA DAWIYÊ TÊBIKOŞIN’

 

Wekîlê DEM Partiyê Mehmet Zekî Îrmez jî bal kişand ser êrişên li Şirnexê didomin û got: “Mafê şînê tê astengkirin. Amirên milkî yên Şirnexê pêşengtiya van êrişan dikin. Îradeya vî gelî, hilbijartiyên wan in. Em îradeya vî gelî ne û dê vê bi tu awayî qebûl nekin. Birêz Erdogan duh got ku hinek derdor hewl didin pêvajoyê sabote bikin. Em jî li Cizîrê vê pirsê dikin; kî ne ev derdor? Gelo dewlet jî di nav de cih digire? Ji bo pêvajo bi aştiyê tacîdar bibe em ê heta dawiyê têbikoşin. Li dijî gefên li hevşaredaran hatine xwarin, divê der heqê amirên milkî de lêpirsîn were destpêkirin.” 

 

Daxuyanî, bi dirûşma “Hevşaredar îradeya me ne” bi dawî bû.