ÊLIH – Siyasetmedarên ku banga tevlibûna mitînga Êlihê kirin diyar kirin ku azadiya Abdullah Ocalan tê wateya azadiya gelan û gotin: “Qebûlkirina mafê hêviyê daxwaza me ya sereke ye”.
Platforma Saziyên Demokratîk sibê dê li Êlihê ji bo azadiya fîzîkî ya Abdullah Ocalan mitîngê li dar bixin. Mitînga ku dê li xaçerêya Dortyolê bi dirûşma “Civaka demokratîk û azadî” ve bê lidarxistin, dê Hevseroka Giştî ya Partiya Herêmên Demokratîk (DBP) Çîgdem Kiliçgun Uçar û Hevberdevka Kongreya Demokratîk a Gelan (HDK) Meral Daniş Beştaş wek axêver beşdar bibin. Hunermend Xêro Abbas dê li mitîngê konserê bide.
Pêkhateyên Platforma Saziyên Demokratîk, ji bo mitînga ku dê sibe bê lidarxistin, banga tevlibûnê kirin. Hevserokê Komeleya Piştevaniya bi Malbatên Girtî û Hikûmxwaran re (TUAY-DER) yê Elihê Hasan Arigtekîn, diyar kir ku dê li mitîngê piştgiriya xwe ya ji bo paradîgmeya Abdullah Ocalan bînîn ziman û dê ji bo gavavêtina dewlet û desthilatê bang bikin. Agritekîn ev tişt got: “Em li dû Rêbrê xwe ne. Paradîgmaya wî ji bo me esas e. Ev paradîgma di nava xwe de aştî, edalet û hiqûqê vedihewîne. Em dixwazin li gorî vê yekê dewlet jî gav biavêje.”
JIYANA HEVPAR
Arigtekîn, desnîşan kir ku jiyana hevpar a gelan bi manîfestoya Abdullah Ocalan ve pêkan e û wiha pê de çû: “Em tenê bi vî rengî dikarin aştiyê pêkbînin. Muxatabê aştiyê rêzdar Ocalan e. Ji bo ev ev nêrîn mayînde bibe em gelê xwe vedixwînin aştiyê. Li mitîngê em bi hevre dengê xwe bilind bikin û daxwazên xwe bînin ziman.”
DAXWAZA GAVÊN ŞÊNBER JI DEWLETÊ
Aktivîsta Tevgera Jinên Azad (TJA) Ezel Aydin, bal kişand ku gelên Kurd gavên pêwîst ji bo pêvajoyê avêtine û diyar kir ku dewletê li gorî vê yekê gavên şênber neavêtiye.
Ezel Aydin, ji bo serketina pêvajoyê banga xurtkirina têkoşînê kir û anî ziman ku mitîng ji bo vê armancê pêk tê û em ê li qada bin.
DIVÊ ‘MAFÊ ‘HÊVIYÊ’ BÊ QEBÛLKIRIN
Ezel Aydinê rave kir ku pêvajo encama têkoşîna salan e û wiha dirêjî da axaftina xwe: “Ji bo gel di mercên azad û wekhev bijîn û ji bo daxwaza perwerdehiya bi zimanê dayikê divê herkes xwedî li mitîngê derbikeve. Ev mitîng, ji bo xwedî li pêvajoya ku di encama têkoşîna salan hatiye bidestxistin, der bikeve tê lidarxistin. Daxwaza me ya sereke azadiya fîzîkî ya Rêberê Gelê Kurd Abdullah Ocalan û qebûlkirina mafê hêviyê ye.”
‘AZADIYA OCALAN AZADIYA GELAN E’
Endamê Meclisa Şaredariya Êlihê Ahmet Ozer, diyar kir ku ev mitîng ji bo azadiya Abdullah Ocalan xwedî wateyekî girîng e û got: “Li Rojhilata Navîn gelek gelên bindest hene, bi salan e dîl in. Mîtînga me dê ji bo daxwaza azadiya wan bibe qadek. Azadiya rêzdar Ocalan, azadiya gelên Rojhilata Navîn e, ev azadî dê bi xwe re azadiya gelê Kurd jî mîsoger bike. 50 sal in şer hebû, aktöre mezin ê ku dê vî şerî bi dawî bike Serok Apo ye. Ev mitîng hem ji bo Ocalan û hem jî ji bo azadiya gelê Kurd girîng e.”
MA / Ozan Bayindir