STENBOL - Hevserokê Komeleya Lêkolînên Kurdî Heno Ronak diyar kir ku polîtîkayên asîmîlasyonê yên ku tên meşandin bi têkoşîna kurdan bi ser neketine û xwest ku Kurdî bibe zimanê fermî.
Hevserokê Komeleya Lêkolînên Kurdî Heno Ronak bal kişand ser hevdîtinên bi Rêberê PKK'ê Abdullah Ocalan re û gengeşeyên li ser çareseriya pirsgirêka kurd û diyar kir ku rakirina astengiyên li pêşiya zimanê kurdî dê tevkariyê li pêvajoyê bike. Ronak pêvajoya diyalogê ya bi navê "Pêvajoya Çareseriyê" ku di navbera salên 2013-2015'an de hat meşandin bi bîr xist û got ku wê demê ji bo rakirina hin astengiyên li pêşiya zimanê kurdî gav hatin avêtin. Ronak got: "Lê mebesta me ji perwerdehiya kurdî ne ev e. Kurd dixwazin di her aliyê jiyanê de bi zimanê xwe biaxivin û xwe bi zimanê dayikê biafirînin. Li dibistanan divê kurd ji pola yekem heta pola zanîngehê bi zimanê xwe perwerde bibin."
'DIVÊ KURDÎ BIBE ZIMANÊ FERMÎ'
Hevserokê Komeleya Lêkolînên Kurdî Heno Ronak
Ronak diyar kir ku zimanê zikmakî mafê mirovan e û nayê muzakerekirin û got: "Ji ber vê yekê hîn ne diyar e ku wê di vê pêvajoyê de çi bibe, tiştekî cuda ye. Lê divê li vir zimanê Kurdî nebe cihê bazarkirinê."
Ronak daxwaza statuya fermî ya zimanê kurdî kir û got: "Divê pêşî li windabûna zimanê kurdî bê girtin. Em mafekî mirovî dixwazin. Ji ber ku zimanê dayikê mafê mirovan e. Bi kurtasî em dibêjin ku divê Kurdî di her warî de be hebe."
'POLÎTÎKAYÊN ASÎMÎLASYONÊ BI SER NEKETIN'
Ronak bal kişand ku bi salan e li çar parçeyên Kurdistanê têkoşîna zimanê zikmakî ya Kurdan tê meşandin û got ku armanca kurdan ew e ku Kurdî di hemû qadên jiyanê de bi kar bînin. Ronak diyar kir ku polîtîkayên asîmîlasyonê yên Tirkiyeyê negihaştine armanca xwe ya li ser zimanê zikmakî û got: "Pêwîst e bê dîtin ku zimanê me gelek birîndar bûye. Îro wekî Komeleya Lêkolînên Kurdî em hewl didin ku zimanê xwe derxînin pêş û pêş bixin. Zimanê me yê ku ji aliyê dewletan ve hatiye binpêkirin, sed sal berê jî hebû û wê îro jî û sibe jî hebe. Bi dîtina min ev yek girêdayî ruhê têkoşîna Kurdan e."
Ronak bal kişand ser zextên li ser kurdî û got: "Duh rê li ber kurdî hat girtin. Îro em dibînin ku rojnameyên kurdî tên qedexekirin, malper tên qedexekirin. Yanî zextên li ser kurdî li her qadê dewam dikin. Çawa ku duh Kurdan Kurdiya ku zimanê wan e di vî warî de bi tenê nehiştin, em ê jî dest ji zimanê xwe bernedin. Wekî Komeleya Lêkolînên Kurdî em ê xebat û lêkolînên xwe yên li ser ziman bidomînin."
MA / Omer Îbrahîmoglû