Siyasetmedar Nûrsel Aydoganê diyar kir ku komkujiyên serdestan nikarin pêşî li têkoşîna jinên azadîxwaz bigirin û ji bo hedefgirtina jinên pêşeng jî wiha got: "Cihê jinên hatine qetilkirin, ji aliyê peyrewên wan ve hatiye dagirtin û ev têkoşîn her domandiye."
Li gorî çeteleya meha Hezîranê ya JINNEWS'ê 25 jin hatin qetilkirin û 27 jî bi guman jiyana xwe ji dest dane.
Kesê bi navê Erdal Şahîn hevjîna xwe Nazli Şahîn û dayika wê qetil kir.
Kesê bi navê D.Y. li Êlihê bi kêran êrişî jina bi navê F.Y. kir ku di qonaxa hevberdanê de bûn. F.Y. di êrişê de bi giranî birîndar bû.
Platforma Rojnamevanên Jin a Mezopotamya diyar kir ku di 3 mehên dawî de 14 rojnamevanên jin hatine binçavkirin û 25 rojnamevanên jin jî hatine darizandin.
Di danişîna doza Ahmet Babat de ku Fîrdevs Babat qetil kiribû, li şahidan hate guhdarîkirin. Şahidan da zanîn ku Ramazan Babat beriya bûyerê gef li Fîrdevs Babat xwaribû.
Hejmara nû ya Kovara Jinê bi manşeta “Di Konfederalîzma Demokratîk de ‘jin, jiyan, azadî’” derket.
Jinan ji bo Peymana Stenbolê destnîşan kirin ku "Hê ji bo me neqediyaye" û gotin ku dê têkoşîna wan a di warê hiqûqî de bidome.
Rojnamevan Şilêr Gûran anî ziman ku felsefeya “Jin jiyan azadî” ji gelên Îranê re bûye ronahî û bi lêv kir ku guhertinên rejîmê yên di “Qanûna Xêlî û Îfetê” de nikarin bandorê li têkoşîna jinan bikin.
Armîta Paver, a tev li çalakiyên “Jin jiyan azadî” yên piştî qetilkirina Jîna Emînî dest pê kirin bû, cara duyemîn hate girtin.
TJA’yê têkildarî tecrîda girankirî ya li ser Rêberê PKK’ê Abdûllah Ocalan daxuyaniyeke nivîskî da û wiha got: “Tecrîda li ser Rêberê Gelê Kurd birêz Abdullah Ocalan sûcê herî mezin ê mirovahiyê ye û hewceye demildest ev tecrîd bê rakirin.”
Dayika Aştiyê Hanse Bulut ku ji ber poşmantiya dihat ferzkirin qebûl nekir tehliyeya wê ji bo 3 mehan hatibû taloqkirin, hate berdan. Bulut, got: “Ez poşman nînim. Heta ku hebim dê dev ji doza xwe bernedim.”
Jinên ku li dijî êrişên dewleta tirk ên li ser Bakur û Rojhilatê Sûriyeyê banga têkoşîna yekgirtî kirin wiha gotin: “Divê li dijî feraseta serwer a dijminê jinan û kurdan em pratîka têkoşîneke xurt nîşan bidin.”
Di axaftinên vekirina Navenda Lêkolîn, Arşîv û Pirtûkxaneya Jinên Kurd de ev peyam hate dayîn: “Çiraya Nagihanê vêxistî dê li vê pirtûkxaneyê aj bide. Felsefeya Jin, Jiyan, Azadî dê mezin bibe.”
Jinên katolanyayê yên ji bo vekirina Navenda Lêkolîn, Arşîv û Pirtûkxaneya Jinên Kurd hatin Silêmaniyeyê, diyar kirin ku îro şahidiya rojeke dîrokî dikin û rizgarî bi têkoşîna jinan a azadiyê pêkane.