AGIRÎ - Endamên Platforma Şaxên KESK'ê yên Qers û Îdirê banga tevlibûna mitînga ku KESK wê di 30'ê Mijdarê de li Enqereyê bi dirûşma "Em nikarin debara xwe bikin" kirin û gotin: "Em ne ji bo şer, ji bo gel û kedkaran budçeyê dixwazin."
Li Meclisê nîqaşên budçeya 2025'an dewam dikin. Konfederasyona Sendîkayên Kedkarên Cemaweriyê (KESK) di 30'yê Mijdarê de wê bi dirûşma "Em nikarin debara xwe bikin. Em li dijî xizaniyê banga têkoşînê dikin" li Qada Tandoganê mitîngekê li dar bixe. Endamên Platforma Şaxên KESK'ê yên Qers û Îdirê banga tevlibûna mitîngê kirin.
‘BILA BUDÇE JI BO ŞER NEYÊ XERCKIRIN'
Serokê Şaxa Qersê ya Sendîkaya Kedkarên Perwerde û Zanistê (Egîtîm Sen) Hakan Topçû hemû karker vexwendin mîtînga ku dê di 30'yê Mijdarê de bê lidarxistin û diyar kir ku tevlibûna mitîngê ji bo îfadekirina daxwazên gelê xizan girîng e. Topçû, got: “Me tu carî serdemeke ku xizanî ev qas kûr bibe, nedîtibû. Em ê daxwaz bikin ku budçeya heyî bi awayekî wekhev li gel were dabeşkirin û budçe ne ji bo şer û diyanetê ji bo zanistê û kedkaran bê dayîn."
Nûnerê Şaxa Îdirê yê Sendîkaya Kedkarên Xizmeta Tenduristî û Civakî (SES) Hasan Onuk jî diyar kir ku ew ê ji Îdirê beşdarî mitîngê bibin. Onuk, got: “Budçeya ku diviyabû ji bo kedkaran bê bikaranîn, mixabin ji bo bazarkirin û kesîdekirinê tê bikaranîn. Em ne budçeyeke ji bo şer, em budçeyeke ji bo kedê û gel dixwazin. Heger budçeya ku ji dewlemendan re tê terxankirin ji gel re were veqetandin dê her kes rihet bibe. Lewma em ê li mitîngê bin."
Sekreterê Hiqûqê ya Perwerdehiyê ya Egîtîm Sen a Îdirê Ayhan Alparslan diyar kir ku ew ê di mitîngê de biqîrînin ku ew nikarin debara xwe bikin û bi bîr xist ku ew di pêvajoyeke ku roj bi roj sînorê xizaniyê zêde dibe re derbas dibin. Alparslan, got: “Em hem wekî xebatkarên cemaweriyê û hem jî wekî gel nikarin debara xwe bikin. Em ji bo perwerde, tenduristî û gel budçeyekê dixwazin. Em naxwazin budçe li cihekî din bê xerckirin. Ji ber vê yekê em di wê baweriyê de ne ku gelê me jî dê beşdarî mitînga ku em ê li dar bixin bibe. Di demên dawî de di bin navê tevdîrên teserûfê de derfeta çayê ya mamosteyan jî hat desteserkirin. Ji ber vê yekê li dibistanan xebatkarên paqijiyê jî nîn in. Di mitîngê de em ê bi dengekî bilind daxwaz bikin ku hikûmet ji bo tenduristî, perwerde û gel budçeyê veqetîne."