STENBOL - Endamê Meclisa DEM Partiyê ya Stenbolê Çetîn Yildiz, ji bo çalakiya ku dê di 31’ê Tebaxê de bi boneya 1’ê Îlonê Roja Aştiyê ya Cîhanê bi dirûşma “Ji bo civaka demokratîk deng deng bide aştiyê” bê lidarxistin banga tevlibûnê kir.
Îsal çalakiyên bi boneya 1’ê Îlonê Roja Aştiyê ya Cîhanê dê li gelek bajaran bên lidarxistin. Tê payin ku Pêvajoya Aştî û Civaka Demokratîk mohra xwe li çalakiyên îsal bide. Bi boneya 1'ê Îlonê dê li Stenbolê jî bi dirûşma "Ji bo civaka demokratîk deng bide aştiyê" mitîng were lidarxistin. Mitîng, dê di 31'ê Tebaxê saet di 14.00'an de bi pêşengtiya Hêzên Ked, Aştî û Demokrasiyê ya Stenbolê li Qada Rihtimê were lidarxistin. Tê payin ku mitîng heta saet 20.00’an bidome. Li gorî agahiyên Komîteya Amadekar a Mitîngê, girse dê saet di 14.00’an de li ber Rawestgeha Metrobusa Sogutluçeşmeyê kom bibe. Amadekariyên ji bo mitîngê didomin. Di vê çarçoveyê de rêxistinên DEM Partiyê yên bajar û navçeyan belavokan belav dikin, standan vedikin û şahiyan li dar dixin.
Endamê Meclisa DEM Partiyê ya Stenbolê Çetîn Yildiz, têkildarî amadekariyên mitîngê agahî da. Yildiz, got: "Şerê li Rojhilata Navîn bêtir kûr bûye. Nexasim rewşa li Xezeyê û guhertinên li Sûriyeyê. Ev geşedan dê eleqeya ji bo banga birêz Abdullah Ocalan jî zêdetir bike. Ji ber ku banga birêz Ocalan a di 27’ê Sibatê de dikare ji bo aştiya Rojhilata Navîn û cîhanê bibe modelek. Pişt re PKK’ê kongreya xwe li dar xist û xwefesixkirina xwe ragihand. Ev yek îradeyeke cidî ya ji bo aştiyê nîşan dide. Gelê Kurd û dostên wan bi gavên cidî ve piştgiriya xwe ya ji bo aştiyê nîşan dan.”
‘EM Ê DAXWAZÊN XEW LI QADAN BIQÎRIN’
Yildiz, anî ziman ku gelek xebat ji bo mitîngê kirine û wiha pê de çû: “Em li hemû qadan dibînin ku daxwazên civakê yên ji bo aştî û civaka demokratîk hene. Hêzên Ked, Aştî û Demokrasiyê yên Stenbolê, ji bo mitîngê plansaziyeke cidî çêkirine. Bi munasebeta 1’ê Îlonê li gelek navçeyên Stenbolê şahî, panel hatin lidarxistin. Di van çalakiyan de em piştgiriya gel a ji bo îradeya rêzdar Ocalan û aştiyê dibînin. Di 1’ê Îlonê de ji bo pêvajo bi awayeke xurt bidome rêzdar Ocalan û hemû girtiyên siyasî bên berdan, gavên hewce yên ji bo demokratbûna Tirkiyeyê bên avêtin em ê biqîrin.”
BANGA TEVLIBÛNA MITÎNGÊ
Yildiz, diyar kir ku li benda tevlibûneke xurt in û axaftina xwe wiha bi dawî kir: “Di van mercên ku şer, metingehî û hilweşandinê de pêdiviya me pir bi aştiyê heye. Pêdiviya Tirkiyeyê bi aştiyê heye. Ji bo hemû pirsgirêk bên nîqaşkirin di mercên demokratîk de pênaseya hemwelatiya wekhev bê kirin divê her kes bi awayeke çalak beşdarî pêvajoyê bibe. Em ê di 31’ê Tebaxê de mitînga xwe li dar bixin û li benda tevlibûna her kesî ne."
MA / Melîk Çelîk