ÊLIH - Tayîp Temel ê DEM Partiyî di Newroza Êlihê de axivî û got: “Heta birêz Ocalan azad nebe, heta şert û mercên wî neyên başkirin encamek ji vê pêvajoyê dernakeve.”
Li Êlihê bi beşdariya bi deh hezaran kesan bi dirûşma “Rebêrtiya Azad Civaka Demokratîk” pîrozbahiya Newrozê hat lidarxistin. Pîrozbahî, li Qada Newrozê ya li Taxa Pazaryeriyê hat lidarxistin. Tevî barînê û hewayê sar jî welatiyan govenda Newrozê gerandin. Bernameya Newrozê bi rêzgirtinê dest pê kir. Di vê navberê de girseyê dirûşmên “Bijî Serok Apo” û “Jin, jiyan, azadî” berz kir. Komîteya Amadekar û siyasetmedaran welatî silav kirin.
‘EM XWEDÎ LI BANGÊ DERDIKEVIN’
Hevşaredara Êlihê Gulistan Sonuk ku li şûna wê qeyûm hatiye tayînkirin, di pîrozbahiyê de got; “Em Newroza xwediyê felsefeya Jin, Jiyan, Azadiyê Rêberê Gelê Kurd Abdullah Ocalan pîroz dikin” û ev tişt anî ziman: “Ev 100 sal in gelê Kurd tune tê hesibandin û îro jî azadiya xwe diqîre. Bi hezaran caran pîroz be. Gelê Kurd bi banga sedsalê re ye, bi çareseriya demokratîk re ye. Yên ku dixwazin vê bibînin bila li vê qadê binêrin.” Hevşaredar Yeşîl Işik jî got: “Newroza hemû gelên Rojhilata Navîn û Kurdistanê pîroz be. Em, vê Newrozê bi banga birêz Abdullah Ocalan pêşwazî dikin.”
Piştre jî Repbêj Blok 72 derket ser dikê. Girseyê demeke dirêj li ber stranên Kurdî govend gerand.
'DIVÊ EM BARÊ OCALAN SIVIK BIKIN’
Cîgirê Hevserokê Giştî yê DEM Partiyê Tayîp Temel diyar kir ku gelê Kurd di Newrozê de daxwaza azadiya fîzîkî ya Abdullah Ocalan dike û ev tişt anî ziman: “Ev Newroz, Newroza azadiyê ye. Ev Newroz, destpêka serdemeke azad e. Birêz Ocalan bangekî dîrokî kir. Banga wî ji bo gelê Kurd, çar parçeyên Kurdistanê û Rojhilata navîn îfadeya serdemeke nû ye. Em ê vê bangê li erdê nehêlin û bigihijînin armanca wê. Banga birêz Ocalan tovê xwe li xaka Kurdistanê reşand. Banga birêz Ocalan banga yekitiya neteweyî ye. Em di serdemeke dîrokî û hesas de ne. Divê em barê birêz Ocalan sivik bikin. Divê em deng bidin vê bangê. Divê em destê girtiyên siyasî xurt bikin. Îroj roja me ye. Ev bar li ser milê we û me ye. Li ser milê gelê Kurdistanê ye.”
BANG LI WEZÎR TUNÇ KIR
Bi domdarî Temel bal kişand ser gotina Wezîrê Dadê Yilmaz Tunç ku digot “Mafê hêviyê di mewzûatên me de tune ye” û wiha axivî: “Heta ku birêz Ocalan azad nebe, heta şert û mercên wî neyên başkirin ev pêvajo encam nagire. Lewma jî gelê Kurd daxwaza azadiya birêz Ocalan dike. Ez bang li wezîrê dadê dikim; van gotinên xwe yên xelet sererast bike. Ên ku li vî welatî daxwaza şer dikin, ew kes in ên dixwazin xwîn birije. Em ê heta dawiê li dijî van hêzên tarî têbikoşin. Yên li Qamişlo û Kobanê van komkujiyan dikin dê hesabê vê bidin.”
Piştre jî hunermend Mehmet Atli derket ser dikê. Piştî stranên Mehmet Atli, bi pêşengtiya jinan agirê Newrozê hate hilkirin.