KONYA - Welatiyên Konyayê bertek nîşanî krîza aborî û bihabûnê û diyar kirin ku hêza wan a kirînê nîne û nikarin tiştên dixwazin bikirin û gotin ku ev rewş tenê bi berteka gel dikare biguhere.
Bi hatina meha Remezanê re li Konyayê bihayên li bazarê her diçe zêde dibin. Li Bazara Şemiyê ya ku li navçeya Selçukluyê, welatî ji ber zêdebûna bihayan û kêmbûna hêza kirînê gazinan dikin. Hem xerîdar û hem jî bazarvan diyar kirin ku şert û mercên aborî her ku diçe dijwartir dibin û divê pirsgirêka buhabûnê bê çareserkirin.
Muharrem Yarimca anî ziman ku ew teqawîtbûyî ye û diyar kir ku kesên teqawîtbûyî di nav beşên ku herî zêde ji buhabûna bandor digirin in. Yarimca destnîşan kir ku ji bo kesekî teqawîtbûyî li bazarê tiştekî ku bixwaze bikire zehmet bûye û wiha got: "Ez teqawid im. Niha kesên teqawîtbûyî zehmet e tiştekî bikire. Roj bi roj biha zêde dibin û hêza kirînê ya welatiyan roj bi roj kêm dibe. Di van şert û mercan de ne pêkan e fiyet baş bibin."
'BERHEMA BI 30 TL'YÎ BÛYE 70-80 TL'
Doguş Şîmşek ê 15 sal in li bazarê dixebite diyar kir ku heta mantiqa bazara serbest di meriyetê de be, aborî nikare pêş bikeve. Şîmşek diyar kir ku meha Remezanê jî veguheriye firsendekê û got ku berhema ku beriya Remezanê 30 TL bû di meha Remezanê de bi 70-80 TL'yî tê firotin. Şîmşek got: "Fêkî û zebeş bi 2-3 TL'yî ji zeviyê tên, lê dema digihêjin bazarê 50-60 TL ye. Mînak ji ber ku Remezan hatiye, buhayên ku hefteya borî 30 TL bû, bûne 70-80 TL. Heta ku dewlet gav neavêje û heta ku pıyaseya serbest hebe, abori baş nebe."
'ÊDÎ EM NIKARIN TIŞTEKÎ BIKIRIN'
Welatiya bi navê Aliye Doganê jî wiha got: "Bi rastî fiyet gelekî biha ne. Ez nikarim bi sala par re bidim ber hev. Zêdebûnek pir zêde heye. Dema hatina Remezanê fiyet zêdetir dibin. Rewşa me pir xerab e, êdî em nikarin tiştekî bikirin. Pêwîst e dewlet piştgiriya cotkaran bike û destekê bide hilberîna xwemalî. Tenê bi vî rengî dikare baştir bibe. Cotkar nayên destekkirin û peydakirina berhemeke herêmî pir zehmet e."
Meral Berkê jî anî ziman ku gel ji ber enflasyona ku her diçe zêde dibe bêzar bûye û wiha got: "Niha tişta ku em dixwazin bikirin pir biha ye. Biha pir zêde ne û roj bi roj zêde dibin. Mînak meha borî kîloya mûz 30-40 TL bû j, vê mehê 70-80 TL ye. Fiyet encax bi bertekên gel dikarin kêm bibin."