Coşa Newroza ku îsal li 89 navendên Kurdistan û Tirkiyeyê bi dirûşmên; ‘Rêbertiya Azad Civaka Demokratîk’ û ‘Civaka Demokratîk ji bo Azadiyê’ tê lidarxistin, bênavber dewam dike. Pîrozbahiyên Newrozê li gelek bajar û navçeyan dewam dikin. Di pîrozbahiyan de hemû çav li Newroza Amedê ne ku wê di 21 'ê Adarê de bê pîrozkirin. Welatiyên li taxa Xana Axpar a Amedê ku yek ji cihên ku duh pîrozbahî lê hate lidarxistin, diyar kirin ku li benda Newroza Amedê ne. Welatiyên ku beşdarî pîrozbahiya li Parka Nûjiyan bûn diyar kirin ku wê daxwazên xwe yên ji qadan bi awayekî li gorî Newroza dîrokî biqîrin.

 

'HER DU DESTÊN ME DI NAVA XWÎNÊ DE BIN JÎ EM Ê BEŞDAR BIBIN'

 

Ceylan Ateş ku bi cil û bergên xwe yên herêmî beşdarî Newrozê bû, diyar kir ku Newroz ji bo kurdan tê wateya aştî û azadiyê. Ceylan Ateş da zanîn ku ew dixwaze Newroza 2025'an bibe wesîleya aştiyê û wiha got: "Em hewl didin vê daxwaza xwe li qadan bînin ziman. Ji ber vê yekê her du destên me din ava xwînê de be jî em ê beşdarî Newroza Amedê bibin. Em ji Newroza îsal bêhtir bi kelecan in. Em bi çar çavan li benda 21 'ê Adarê ne. Wê rojê ji her derê Tirkiyeyê mirov bên Newroza Amedê."

 

JI NEXWEŞXANEYÊ DERKET HAT NEWROZÊ

 

Munîre Kurt ku piştî ji nexweşxaneyê derket hat qada Newrozê diyar kir ku ew dixwazin Newroz aştî û wekheviyê bîne. Munîre Kurt diyar kir ku ew ê di 21 'ê Adarê de biçe Newroza Amedê û wiha got: "Hêvîdarim wê aştiyê bîne tevahiya cîhanê. Em aştiyê dixwazin, lê divê wekhevî be."

 

Saîme Aslan diyar kir ku piştî banga Rêberê Gelê Kurd Abdullah Ocalan hêviyên aştiyê zêdetir bûne û diyar kir ku bi vê bangê re gavek hatiye avêtin û divê aliyê din jî vê yekê nîşan bide ku ew aştiyê dixwaze û wiha got: "Eger di 21'ê Adarê de nemirim, ez ê li wê qadê bim."

 

DÊ GOTINA XWE DI NEWROZÊ DE BÎNIN ZIMAN

 

Huseyîn Tûnç da xuyakirin ku ji bo daxwaza aştiyê ew ê li Amedê be û wiha got: "Em dixwazin agirê şer êdî bê vemirandin. Bila di Newrozê li şûna agirê şer agirê Newrozê bê gurkirin.”

 

Îbrahîm Tekîn ê ji Kocaeliyê ji bo beşdarî Newroza Amedê bibe hat wiha got: "Ji bo Kurdan hiqûq çi be em dixwazin. Di 21'ê Adarê de ez ê beşdarî Newroza Amedê bibim. Kurd divê wê rojê li wir bin da ku bibînin ku ew hene. Weke gelê Kurd em ê li wir gotinên xwe bînin ziman."

 

Zîlan Çaki, anî ziman ku piştî banga Rêberê Gelê Kurd Abdullah Ocalan a di 27 'ê Sibatê de hat kirin, ji bo daxwaza aştî û biratiyê xurt bikin li qadan Newrozê pêşwazî dikin. Zîlan Çaki diyar kir ku ji bo ew bibêje; ‘Em li vir in’ dê di 21 'ê Adarê de biçe Newrozê û wiha got: "Ji bo piştgiriyê bidin banga Abdullah Ocalan em ê li wir bin. Weke gelê Kurd em ê peyama xwe li qadên Newrozê bidin. Vê carê divê mirov ji bo aştiyê werin Qada Newrozê. Divê em hemû bi rengekî ku li gorî banga dîrokî be li qadan bin."

 

‘DI NEWROZA AMEDÊ DE DÊ DÎROK WERE NIVÎSANDIN’

 

Delal Aslan diyar kir ku ew her sal li benda Newrozê ne, lê bi banga wan heyecana wan du qat zêde dibe wiha got: "Em dizanin ku wê bi milyonan kes beşdarî Newroza ku wê li Amedê bê lidarxistin bibin. Em bi çar çavan li benda vê ne. Li vir li qadê em Newrozê pîroz dikin lê çavên me hemûyan li Newroza Amedê ye. Di 21 'ê Adarê de em ê hemû li erdê bin û bersivê bidin bangawaziyê." 

 

Berdan Akyüz da zanîn ku Kurdan her tim aştî xwestiye û wiha got: "Ji bo ev banga birêz Ocalan ku daxwaza wî ya aştiyê ye hîn bi dengekî bilindtir bê ziman, em ê bi tevahî li qadan bin. Bila dinya vê bibihîze û bizanibe; Kurd bi sekna xwe her tim bûye dîrok. Bi sekna xwe dîrok ronî kirin û coş kirin. Di vê pêvajoyê de pozîsyona Kurdan wê dîsa dîrokî be. Ciwanên Kurd bi sekna xwe dîrok afirandine. Kurd wê dîrok, xweza û nasnameya xwe biparêzin. Em ê ji bo aştiyê li qadan bin."

 

Li aliyê din Hatîp Tekîn jî anî ziman ku Newroza 2025'an di warê girîngiyê de cuda ye û piştî banga aştiyê Newroz bêhtir dîrokî bûye.

 

MA / Şîrvan Şîlan Çîl