MÊRSÎN - Nûnerên partiyên siyasî li pêşiya Şaredariya Akdenîzê bertek nîşanî îktîdarê dan û gotin: “Dê qeyûm biçin, gel dê bimîne. Em ê serî netewînin.”
Di 13’ê Çileyê de li Şaredariya Akdenîzê ya Mêrsînê qeyûm hate tayînkirin û bertekên li dijî tayînkirina qeyûm di roja 6’an de didomin. Nûnerên partiyên siyasî, rêxistinên civaka sivîl û gelek welatî li pêşiya avahiya şaredariyê ku ji hêla polîsan ve hatiye dorpêçkirin, hatin gel hev. Di daxuyaniyê de gelek caran dirûşmên “Em ê bi berxwedanê bi ser kevin” û “Akdenîz a me ye, şaredarî ya me ye” hatin berzkirin. Li pêşiya şaredariyê daxuyanî hate dayin.
Hevseroka DEM Partiyê ya Mêrsînê Bedriye Kuş di daxuyaniyê de wiha got: “Hevşaredarên me ev 6 roj in girtî ne. Em vê qebûl nakin. Me beriya niha qeyûm nas nekir û dê nas nekin. Heta ku hevşaredarên me dîsa tên ser peywira xwe dê têkoşîna me bidome. Qeyûm, dizî ye. Em zîhniyeta qeyûm nas nakin.”
EHP: MÎNAKA VÊ BÊHIQÛQTIYÊ LI CÎHANÊ TUNE YE
Serokê Giştî yê Partiya Tevgera Kedkar (EHP) Hakan Ozturk bertek nîşanî tayînkirina qeyûm da û wiha got: “3 meh berê gotin ‘werin em aştiyêbikin’ lê niha qeyûm tayîn kirin. Em vê qebûl nakin. Qedrê gelê Kurd ê tevî qeyûman jî behsa aştiyê dike bizanin. Dema Kurd nerazîbûna xwe nîşan didin jî hûn qala ‘terorê’ dikin. ‘Teror’ tune ye, bêwijdaniya we heye. Mînaka vê bêhiqûqtiyê li cîhanê tune ye. Divê hevşaredar tavilê vegerin ser peywira xwe. Heta ku em hemû qeyûman yek bi yek dişînin em ê têkoşîna xwe ya hevpar bidomînin.”
TOP: EM Ê TÊKOŞÎNÊ MEZIN BIKIN
Endama Lijneya Berdevkan a Partiya Azadiya Civakî (TOP) Pelîn Kahînoglû jî ev tişt anî ziman: “AKP qanûna li gorî keyfa xwe amade dike. Di demekî qala aştiyê dikin de qeyûman tayîn dikin. Em ê li dijî vê li her derê têkoşîna xwe mezin bikin û em ê bi ser kevin.”
EMEP: DÊ QEYÛM BIÇE
Cîgirê Serokê Giştî yê Partiya Kedê (EMEP) Sedat Başkavak jî wiha got: “Ev 6 roj in em xwedî li îradeya xwe derdikevin û dibêjin qeyûm bêhiqûqtî ye. Qeyûm kedxwarî ye. Qeyûm dijminê hunerê, sînemayê, dijminê pêşerojê ye. Dê qeyûm biçin, gel dê bimînin.”
TÎP: QEYÛMAN TAYÎNÎ ÇETEYAN BIKIN
Endamê Meclisa Partiyê (PM) yê Partiya Karkerên Tirkiyeyê (TÎP) Hasan Yildiz dema diaxivî, polîsan bi telefonên xwe dîmen kişandin. Gel, bertek nîşanî polîsan dan. Parlamenterê DEM Partiyê Sînan Çîftyurek nehişt polîs bi telefonên xwe dîmenan bikişînin. Piştre jî Yildiz axivî û wiha bertek nîşan da: “Qeyûman tayînî çeteyên zarokan qetil dikin. Dê qeyûm winda bikin, gel dê bi ser keve. Ev zîhniyet neçarî têkçûnê ye.”
KKP: GELÊ KURD DÊ SERÎ NEEWÎNE
Endamê MYK’a Partiya Komunist a Kurdistanê (KKP) û Parlamenterê DEM Partiyê yê Wanê Sînan Ççîftyurek jî wiha got: “Çima îradeya gelê Anatoliyayê tê naskirin lê ya Kurdan nayê naskirin? Em siyaseta qeyûm şermezar dikin. Ji sindoqê îradeya gel derket lê nas nakin. Me tu caran ev qebûl nekir û dê qebûl nekin jî. Hûn ê nekarin bi dayikên me, bi gelê me serî bidin tewandin. Destê xwe dirêjî Kurdan dikin lê qeyûman tayîn dikin, êrişî Rojava dikin. Em vê biratiyê qebûl nakin.”
SODAP: QEYÛM NÎŞANEYA TIRSÊ YE
Endama MYK’a Platforma Piştevaniya Sosyalîst (SODAP) Doganay Karasu jî wiha got: “Em careke din bi kiriyareke faşîzmê ya li dijî Kurdan re rû bi rû ne. Tayînkirina qeyûm a li Şaredariya Akdenîzê, binçavkirin û girtin, nîşaneya tirsa ji daxwaza aştî û azadiyê ya gel e.”
Daxuyanî bi dirûşma “Em ê bi berxwedanê bi ser kevin” bi dawî bû.