Partiya Demokratîk a Gelan (HDP) ji bo pêkanîna 13 biryarên ku di Kongreya Mezin a 5'an de hatibûn girtin di 7'ê Îlonê de tevî rêvebirên partiyê yên Enqere, Konya û Eskîşehîrê û navçeyên wan li Navenda Giştî atolye li dar xistin. 

 

Di atolyeyan de mijarên bi sernavê "Tifaqa Demokratîk", "Avakirina Komara Demokratîk", "Li Dijî Polîtîkayên Şer û Tecrîdê Aştî û Çareserî", "Binpêkirinên Mafan ên li Girtîgehan û Girtiyên nexweş", "Jiyana Aborî ya Demokratîk û Ehlê Gel", "Têkoşîna li Dijî Sûcên li Dijî Xwezayê”, “Tov Şîn Dibin”, “Rêvebiriyên Herêmî yên Demokratîk”, “Meclîsên Ciwanan”, “Polîtîkayên Astengdaran”, “Biratiya Gelan”, “Bi Zarokan re ber bi Pêşerojeke Azad” û “Ji bo Kesên Teqawidbûyî Jiyaneke Mirovî û Birûmet" hatin nîqaşkirin. 

 

Endama Meclisa Partiyê ya HDP'ê Bedriye Yorgûn ku tevî Koordînasyona Jinan û endama Meclisa Partiyê Nilgûn Salmaner xebatên atolyeyê koordîne kir, xebatên hatine kirin û encamên wan wan nirxandin.

 

Yorgûn destnîşan kir ku polîtîkaya sereke ya HDP'ê feraseta rêvebiriya xwecihî û liv û tevgera bi hêzên xwecihî re ye û got, bi xebatên xwe armanc kirine ku bê li herêmê polîtîkayeke çawa tê kirin û kêmasiyên xwe yên di warê çareserkirina pirsgirêkan de bibînin. 

 

‘MEKANÎZMAYEKE RÊXISTINKIRÎ'

 

Yorgûn bilêv kir ku feraseta siyasetê û mekanîzmayên hilberandina polîtîkayê ya HDP'ê ji ya partiyên di nava sîstemê de cudatir e û got: "Ferqa me ew e ku em siyasetê bi dînamîkên xwecihî re dikin. Tevî jinan û rêxistinên civaka sivîl em ji kolanan dest pê dikin û vê yekê berbiçav dikin. Me dît ku ev di pratîkê de ne wiha ye û feraseteke ku hinekî bendewarê navendê heye. Paradîgmaya we û xeta we ya siyasî ya îdeolojîk çi qas bihêz dibe bila bibe, lê ji bo ev bê birêxistinkirin û pratîka wê çêbibe an jî siyaset bê civakîkirin, pêdivî bi mekanîzmayeke rêxistinbûyînê ya li ser esasê polîtîkbûyîna civakê heye. Me dît ku ev xeta me ya siyasî û argumanên bîrdozî yên ku ev qasî xurt û her derdorê dihewînin baş nehatine fêmkirin." 

 

Yorgûn destnîşan kir ku ji bo ku paradîgmaya HDP'ê hîn bêtir bibe parçeyeke civakê, pêdivî bi rêxistinbûyîneke hîn bêtir heye û got: "Me di atolyeyan de kêmasiyên xwe yên bi vî rengî dîtin." 

 

Yorgûn bilêv kir ku kesên xebat bi rê ve birine bi xwe kêmasiyên di warê çareserkirina pirsgirêkan de û avakirina mekanîzmayên demokratîk de dîtine û got: "Gotin, rol û rista xwe baş nelîstine. Wan bi xwe rê û rêbazeke ku dê di warê rol û berprisiyariyê de bigirin nîqaş kirin. Perspektîfeke çareseriyê danîn holê ku dê pirsgirêkan çawa di demeke kurt, demeke navîn û demeke dirêj de çareser bikin." 

 

TECRÎD Û BANDORÊN WÊ

 

Yorgûn bibîr xist ku partiya wan tecrîdê wekî sûcê li dijî mirovahiyê dibîne û wiha axivî: “Di warê jiholêrakirina tecrîdê de polîtîkayên berbiçav hildiberîne û gavan diavêje. Di nîqaşên li atolyeyên me de hat dîtin ku feraseta ku tecrîd tenê li Îmraliyê tê pêkanîn ne rast e, ji lew re ew der laboratûwar e û bêdengiya li hemberî tecrîda li wir kiriye ku tecrîd li tevahiya civakê belav bibe û her wiha astengiya herî mezin a li ber demokratîkbûyîna Tirkiyeyê ye. Li vir jî zelal bû ku tecrîd, pêkanîna feraseteke qedexeker e ku sîrayetî hemû qadên civakê kiriye." 

 

‘EM Ê XEBATÊ BERFIREHTIR BIKIN'

 

Yorgûn destnîşan kir ku atolye coş û motîvasyonek afirandiye û got, wan ji bo xurtkirin feraseta rêvebiriyên xwecihî xebateke li ser asasê hilberandina çareseriyê kiriye. 

 

Yorgûn di dawiya axaftina xwe de got: "Me mijarên ku di bername û tuzuka partiya me de yên derbarê tespîtkirina pirsgirêkan de danîn holê ku di demeke kurt, navîn û dirêj de ji bo wan bernameyek bê çêkirin û refleksan hinekî din bên xurttirkirin û ne bi helwesteke rojane, bi helwesteke stratejîk nêzî bûyeran bibin. Me nîqaş kir ku divê rêya sêyemîn li herêmê çawa bê meşandin û çawa bê pêkanîn. Armanca me, em vê xebatê berbelavtir bikin. Em ê li her bajarî, li gor xisûsiyeta her bajarî vê xebatê bikin." 

 

MA / Bêrîvan Altan