ROJEVA 28’Ê ADARA 2024’AN
- rojane
- 09:00 28/3
Girtiyê bi navê Lokman Yalçin ku li Girtîgeha Tîpa T a Xelatê tê ragirtin got ku madeyên birînê avêtine cihê hewadariya wan û ewlehiya canê wan tune ye.
Parlementerê DEM Partiyê yê Kocaeliyê Omer Farûk Gergerlîoglû ku li navçeya Misircê axivî, anî ziman ku tu hêz nikare dengê kesên ku dibêjin "Berxwedan jiyan e" bibire û wiha got: “Em dibêjin ku kesê li ber xwe dide dê azad bibe û em jî li dijî hemû astengî û zordariyê li ber xwe didin.”
Namzeta hevşaredariya DEM Partiyê Devrîm demîr ku li Mêrdînê navçe bi navçe xebatan dimeşîne got: “Em ê li Kurdistanê bi rêjeyeke zêde bi ser bikevin. Em ê bersiveke xurt bidin vê pergalê.”
Li navçeya Hawêl a Sêrtê di navbera du koman de li ser namzetiya keyatiyê şer derket. 4 jê giran 8 kes birîndar bûn.
Çalakiya Nobeda Edeletê ya Emîne Şenyaşarê ya li ber Wezareta Dadê di roja 63’emîn de berdewam kir. Polîsan destûr neda ku EMEP'î piştgiriyê bidin nobeda Şenyaşarê.
Li Stenbolê di serdegirtina malan de zêdetirî 9 endamên Meclisa Ciwanên DEM Partiyê hatin binçavkirin.
Namzetê Hevşaredariya Bajarê Mezin ê Enqereyê yê DEM Partiyê Ozturk Turkdogan, serdana navendên giştî yên TÎHV û ÎHD’ê kir û bernameyên xwe yên hilbijartinê vegot.
Siyasetmedara kurd Leyla Zana çû serdana Nobeta Edaletê ya li Êlihê û wiha got: “Nasnameya azadiyê, nasnameya dayikan e. Ne tenê li zindanan, di nava çar dîwarên malê de jî têkoşîneke mezin meşandin. Heke ne ji têkoşîna wan bûya, niha zimanê me tune bûbûya.”
Şaxa OHD’a Stenbolê rapora xwe ya salane ya têkildarî binpêkirinên li girtîgehên Herêma Marmarayê eşkere kir. Di raporê de hat diyarkirin ku cezayên disiplînê li girtiyên ketine greva birçîbûnê hatine birîn, bijîşk muayeneya destkelemçekirî li girtiyan ferz dikin û girtiyên lêgerîna tazî red dikin jî hatine derbkirin.
Gelek kesên ji bo rayên xwe li bajarên xwe bikar bînin serî li DEM Partiyê dabûn, ji navçeya Bodromê bi rê ketin.
Şaredariya Wêranşarê ya AKP’î bi îdiaya ku “hewcehiya wî bi alîkariyê heye û derfetên wî yên madî nînin” 70 hezar lîre alîkariya pereyan daye zêringir Mûstafa Baş ê rêveberiya AKP’ê ya navçeyê kiriye.
Ji bersûcên doza cînayeta Hrant Dînk rayedarê Îstîxbarata Cendirmeyan Veysel Şahîn diyar kir ku wan agahiya cînayetê 6 meh beriya cînayetê girtine. Şahîn, da zanîn ku wan bi fermana Midûrê Şaxa Îstîxbarata Cendirmeyan a Trabzonê Metîn Yildiz, weke ku agahî rojekê piştî cînayetê hatibe ber destê wan, rapor amade kirine.
Hatîce Yildiz a 75 salî ku ji ber pere ji keça xwe ya girtî û hevala wê re şandibû hatiye girtin, li girtîgehê rewşa wê aloz bû û rakirin nexweşxaneyê.
Ji bo mitînga Serokkomarê AKP’yî Tayyîp Erdogan ji navend û navçeyên derdorê bi wesayîtan mirov hatin veguhestin. Şagirtên dibistanên seretayî û navîn jî di destê wan de al ji dibistanê birin qada mitîngê.