ROJEVA 27'Ê GULANA 2024'AN
- rojane
- 09:00 27/5
Hejmara 232’yan a Rojnameya Xwebûnê bi manşeta “Têkoşîna hezar hefteyî” derket û bal kişand ser têkoşîna Dayikên Şemiyê ku 1000 hefte li pey xwe hişt.
DEM Partiyê li Curnê Reş a ku hilbijartin dê lê bên nûkirin ji çar aliyan lez da xebatên xwe. Endamên partiyê yên derî bi derî geriyan, bang li gel kirin ku xwedî li vîna xwe derkevin.
Di rêzeqezaya li ser Rêya Edene û Mêrsînê çêbû de 10 kesan jiyana xwe ji dest dan û 30 kes jî birîndar bûn.
Nexweşê ku dema li servîsa psîkîyatriyê ya qata sêyemîn a Nexweşxaneya Dewletê ya Qoserê dihate razandin xwe di paceyê de avetibû û giran birîndar bûbû, piştî 25 rojan jiyana xwe ji dest da. Şaxa SES’ê ya Mêrdînê di rapora ku amade kir de xemsarî rêz kirin.
Emîne Şenyaşar ku 113 roj in li ber Wezareta Edaletê li edaletê digere, ji aliyê Sekretera Têkiliyên Navneteweyî ya ST Fackorbundent a mezintirîn sendîkaya karkeran a Swêdê Karîn Brunzell ve hat ziyaretkirin.
SOHR’ê da zanîn ku li herêma Derayê ya Sûriyeyê di nava 24 saetan de 6 kes hatin binçavkirin, 3 kes hatin revandin û 2 kes hatine kuştin.
TUAY-DER’ê 4’emîn Kongreya Asayî li dar xist. Di peyamên kongreyê de banga mezinkirina têkoşîna li dijî tecrîda li ser Rêberê PKK’ê Abdullah Ocalan hate kirin.
Ergun Akdogan ku li girtîgehê jiyana xwe ji dest da, li navçeya Xozatê hate definkirin.
Girtiyê edlî Ercan Çakar ku li Girtîgeha Tîpa S a Îdirê dihat ragirtin, li girtîgehê bi awayekî guman jiyana xwe ji dest da.
Girtî Mehmet Emîn Çam ê 72 salî ku li Girtîgeha Tîpa T a Beşîriyê tê ragirtin û krîza dil derbas kiribû, ji beşa çavdêriya awarte hate derxistin.
Li Mêrsîn û Stenbolê bi dirûşma “Deng bide azadiyê” çalakî hatin lidarxistin. Di çalakiya Stenbolê de gelek kes hatin binçavkirin.
Qeymeqamê Nisêbînê Ercan Kayabaş gefa kuştinê li rojnameger Ahmet Kanbal xwaribû û ji bo nûçeyên têkildarî Kayabaşi biryara astengkirinê hate dayîn.
Li navçeya Geverê bi ser malan de hate girtin û zarok jî di nav de gelek kes hatin binçavkirin.
Komên paramîlîter li Efrînê welatiyekî daxwaza mala xwe ya hatiye desteserkirin dikir revand û wesayîta wî xesp kirin.