ROJEVA 8'Ê ÇILEYA 2024'AN
- rojane
- 09:00 08/1
Hejmara 212’an a Rojnameya Xwebûn bi manşeta “Serkeftin wê ya dayikan be” derket pêşberî xwînerê xwe.
Cenazeyê derhênerê kurd Mensûr Kerimiyan ê di êrişên dewleta tirk ên li dijî Rojava de jiyana xwe ji dest dabû, li Silêmaniyê hate veşartin.
Keça Simkoyê Şikak, Hediye Zîrekbîlek di sed saliya xwe de jiyana xwe ji dest da.
Di çalakiyên bi daxwaza “Ji Abdullah Ocalan re azadî” de peyama domandina têkoşînê hate dayîn.
Parlamenterê DEM Partiyê yê Colemêrgê Onur Duşunmez da zanîn ku gelek leşkerên li Rîze û Tokatê weke hilbijêr li bajarokê Bajêrgeyê hatine veguhestin.
DEM Partiyê ji bo hezar û 214 “hilbijêrên” li navçeya Gêlê li herêma leşkerî hatine veguhestin li Lijneya Hilbijartinê ya Navçeyê îtîraz kir.
Nivîskar û rewşenbîran li Amedê deklarasyona “Ji bo aştiyê bibe dengek” eşkere kirin. Di deklarasyonê de hat diyarkirin ku hevdîtinên bi Abdullah Ocalan re ku yek ji muxatabên pirsgirêkê ye, îxtîmala çareseriyê derxist holê û ev bang hat kirin: “Ev pêvajo dikare ji nû ve dest pê bike. Divê mirov ji diyalog û axaftinê netirse.”
Di çarçoveya kampanyaya “Ji Abdullah Ocalan re azadî” de li Mêrdînê Nobeta Edaletê hate destpêkirin. Parlamenterê DEM Partiyê Kamûran Tanhan wiha got: “Divê bi destê Abdullah Ocalan ê ji bo aştiyê tê dirêjkirin bê girtin.”
Deklarasyona “Em bibin dengek ji bo aştiyê” ku ji qadên wêje û hunerê 564 kesan îmze kir hate weşandin. Di deklarasyonê de hat diyarkirin ku pirsgirêk dikarin bi rêbazên muzakereyê bên çareserkirin û wiha hat gotin: “Ji bo aştiya civakî divê bi cisaret bin. Hewceye hikûmet dev ji siyaseta zext, tecrîd û şer berde.”
Cezayê îdamê ku rejîma Îranê dabû 4 girtiyên kurd, hat erêkirin.
Bi ser qetilkirina rojnameger Metîn Goktepe re 28 sal derbas bûn. Rojnameger Fatîh Polat got ku ji wê rojê heta niha israra rojnamegeriyê ya li dijî zextan didome û wiha got: “Li welatekî mîna Tirkiyeyê bedelekî azadiya çapemeniyê heye. Parastina wê jî bi têkoşînê dibe.”
Fahriye Çukur ku keça wê Rozerîn a 16 salî di dema qedexeya derketina kolanan a li Sûrê de hate qetilkirin, diyar kir ku kenê keça wê tu carî ji bîra wê naçe û wiha got: “Bi qasî ku sax bim dê her tim mafdariya keça xwe biparêzim û dev ji doza wê bernedim.”
Jinên efrînî ku li Şehbayê dibin êrişên Tirkiye û ambargoya rejîma Şamê de dijîn, anîn ziman ku wê tu carî dest ji têkoşînê bernedin û gotin: "Êriş û ambargo çi qas berdewam dikin bila bikin, lê em dest ji berxwedana xwe bernadin û gavekê jî paş de navêjin."
Siyasetmedar Zeynep Olbecî ku di çarçoveya Doza Kobanê de tê darizandin, got: "Min û hevalên min ji bo rakirina tecrîdê û ji bo destpêkirina muzakereyan dest bi greva birçîbûnê kiriye."