ROJEVA 11’Ê NÎSANA 2024’AN
- rojane
- 09:00 11/4
Nobeta Edeletê ya Emîne Şenyaşarê ya li ber Wezareta di roja 74’emîn de berdewam dike.
Li Amed, Mêrsîn, Stenbol, Edene, Kirikkale û Mûglayê di serdegirtina malan de 15 kes hatin binçavkirin.
Hevşaredarên navçeya Pasûrê û ya bajarokê Ziyaretê mazbatayên xwe wergirtin û pîrozbahî li dar xistin.
Di depoya febrîqeya tekstîlê ya li Rihayê de şewat derket.
Di 4 rojên ewil ên betlaneya Cejna Remezanê de 2 hezar û 453 qezayên trafîkê çêbûn. Di qezayan de 26 kesan jiyana xwe ji dest dan û 3 hezar û 870 kes jî birîndar bûn.
Xizmên girtiyan ên di Nobeta Edaletê di çalakiya îro de cejna Rêberê PKK’ê Abdullah Ocalan û girtiyên siyasî pîroz kirin.
Parastina Hevserokê Giştî yê HDP’ê yê berê Selahattîn Demîrtaş a di Doza Kobanê de bi navê “Doza Jiyana Birûmet” weke pirtûk hate çapkirin.
Bi boneya Cejna Remezanê li bajarên Bakur û Rojhilatê Sûriyeyê bi hezaran kes çûn serdana kesên di têkoşîna azadiyê de jiyana xwe ji dest dayîn.
Di roja ewil a Cejna Remezanê de li gelek bajaran gorên kesên di têkoşîna azadî û demokrasiyê de jiyana xwe ji dest dayîn hatin ziyaretkirin. Her wiha cejna malbatên girtiyan hatin pîrozkirin.
37 parlamenteran ji bo Ecevît Pîroglû ku 59 roj in di greva birçîbûnê de ye bang li hikûmeta Sirbistanê kirin û xwestin Pîroglû were berdan.
Piştî barana zêde ya li Wanê, li ser sê noqteyên rêbejê hezaz çêbû û rê hatin girtin. Her wiha sê gund jî di bin avê de man.
Bi boneya Cejna Remezanê gora Vedat Aydin hat ziyaretkirin. Hevjîna Aydin di bîranînê de axivî û wiha got: “Divê em tu caran keda şehîdan ji bîr nekin. Divê em wan ji bîr nekin û heke em di rêya wan de bimeşin dê bi ser kevin.”
Hevserokên Giştî yên DEM Partiyê Tulay Hatîmogûllari û Tuncer Bakirhan bi boneya Cejna Remezanê peyamên pîrozbahiyê parve kirin û xwestin cejn bibe wesîleya aştî û azadiyê.
Qeyûmê Şaredariya Qoserê ku şaredarî 106 milyon TL’an di bin deyn de hiştiye, dema çûyî bi xwe re hem personelên ÎŞKUR’ê hem jî wesayîtên kirêkirî bir. Hevşaredar Zeynî Îpek got ku tevî her tiştekî ew ê xizmetên xwe bikin.