RIHA - Înîsiyatîfa Malbatên Pirsûsê bi minasebeta salvegera Komkujiya Pirsûsê panel li dar xist. 

 

 

Înîsiyatîfa Malbatên Pirsûsê li Eywana Konferansê ya Tahîr Elçî ya Baroya Rihayê panela bi sernavê "Têkoşînên edaletê û wezîfeyên me" li dar xist. Parlamenterê DEM Partiyê yê Rihayê Ferît Şenyaşar, Hevseroka Federasyona Meclisên Ciwanên Sosyalîst (SGDF) Berfîn Polat, nûnerên rêxistinên sivîl û partiyên siyasî û gelek kes tev li panelê bû. Wêneyên 33 qurbaniyên komkujiyê li eywanê hatin daliqandin. 

 

Panelê bi deqîqeyek rêzgirtinê dest pê kir. Belgefîlma ku behsa komkujiyên Amed, Pirsûs û Enqereyê dike hat nîşandan. 

 

Piştî nîşandana panelê axaftin hatin kirin. 

 

Hevseroka SGDF'ê Berfîn Polat bi bîr xist ku 9 sal bi ser komkujiyê re derbas bûn û da zanîn ku rêxistina hovane di salvegera Şoreşa Rojava de êrişê pêk anî. Polat destnîşan kir ku tişta ku herî zêde dewlet jê ditirsiya Şoreşa Rojava bû û dewletê xwest bi komkujiyê bersivê bide şoreşê û got: "Doza Kobanê ya kumpasê jî mînaka vê yekê ye. Komkujiya Pirsûsê komkujiyek ciwanan bû." 

 

 

Parlamenterê DEM Partiyê Ferît Şenyaşar jî diyar kir ku piştî komkujiyên DAIŞ'ê vê carê endam û parlamenterê AKP'ê jî li dijî malbata wî heman komkujî pêk anîn û behsa pêvajoya dozê-darizandinê kir. 

 

Parêzer Sevda Çelîk Ozbîngol jî axivî û behsa pêvajoya darazê ya komkujiyê kir.