STENBOL - Li gelek navçeyên Stenbolê bi boneya 76'emin rojbûna Rêberê Gelê Kurd Abdullah Ocalan dar hatin çandin. 

 

Li navçeyên Bagcilar û Sancaktepe yên Stenbolê bi wesîleyaneya 76'emîn rojbûna Rêberê Gelê Kurd Abdullah Ocalan, bi pêşengiya DEM Partiyê dar hatin çandin.

 

BAGCILAR

 

Rêxistina DEM Partî ya Bagcilarê, 3 dar li baxçeyekî li Taxa Goztepe çandin. Hevserokên DEM Partî yên Bagcilarê, endamên Înîsiyatîfa Dayikên Aşitiyê, TJA û gelek kes tevlî dar çandinê bûn. Dar bi dirûşmeyên “Rojbûna te pîroz be ey Serok Apo”, “Bijî Serok Apo” hatin çandin.

 

Piştre Dayika Aşitiyê Sabîha Bozan axivî û wiha got: “Rojbûna Abdullah Ocalan ji bo tevahî gelan pîroz be. Xwestin betonê birjînin ser gelê kurd û xwestin mafên me tune bikin û jinan tune bihesibînin. Lê bi 4’ê Nîsanê re plan hatin guhertin.”

 

Piştî axaftinê li ber stranan govend hate gerandin.

 

SANCAKTEPE

 

Bi pêşengiya Rêxistina DEM Partî ya Sancaktepeyê li baxçeyekî li Taxa Yenîdogan dar hatin çandin. Hevserokên DEM Partî ya Sancaktepeyê Ayşe Çîftçî û Çetîn Yildiz jî di nav de gelek kes tevlî dar çandinê bûn. Dar bi dirûşmeyên “Rojbûna te pîroz be ey Serok Apo”, “Bijî Serok Apo”, çepik û tilîliyan hatin çandin.

 

Hevserok Ayşe Çîftçî wiha got: “Rêbertiya me bû sedem ku em ji taritiyê ber bi ronahiyê ve herin. Baş e ku jidayik bûye û bûye Rêberê me.”

 

Her wiha li navçeyên Ataşehîr, Kuçukçekmece, Arnavutkoy, Eyup, Kartal û Umraniye yên Stenbolê bi tevlîbûna gelek kesan dar hatin çandin.