AMED - Parlementera HDP’ê Dersim Dag, bertekên gundiyên Licê yên li dijî birîna darên wan bir rojeve Meclîsê.

 

Parlementera Partiya Demokratîk a Gel (HDP) a Amedê Dersîm Dag, têkildarî birîna darên ku li gel leşkeran li daristanên gundên Dêrxus û Huseynik ên navçeya Licê ya Amedê pêk tên pêşniyazpirsek pêşkeşî Wezîrê Çandinî û Daristanê Bekîr Pakdemîrlî kir.

 

Dag, di pêşniyazpirsa xwe de diyar kir ku şêniyên gundên Dêrxus û Huseynik birîna daran qebûl nakin û dixwazin demildest birîn bê rawestandin. Dag, bi armanca ku Wezîr Pakdemîr bersiv bide ev pirs kirin: 

 

“* Hêceta birîna daristana di nav gundên Dêrxus û Huseynik de çi ye? Palpişta wê ya hiqûqî çi ye?

 

* Gelo li heremê, dar bi armanca ewlehiyê tên birîn?

 

* Gelo hêceta birîna daran a di çarçoveya operasyoneke eskerî ya mezin de pêk hatiye çi ye?

 

* Çima çûna mêrgan a gundiyan a ji bo çêrandina pez tê astengkirin?

 

* Gelo ji bo birîna daran hêceta neagahdarkirina şêniyên gunda çi ye? 

 

* Wezareta we vê birîna bêyî agahdarkirin û daxwaza gundiyan pêk hatiye, gelo wê bide sekinandin?

 

* Di 5 salên dawî de bi hêceta ewlehiyê li kîjan hereman çend dar hatine birîn?”