Piştî qeyûm tayînî şaredariyên DBP'î hatin kirin, dawî li pergala hevserokatiyê hat anîn û paşê tabeleya bi kurdî, erebî û tirkî ya Şaredariya Sêrtê hat guherandin û bi yekzimanî hat çêkirin. Niha jî ji ber hilbijartina herêmî ya 31'ê Adara 2019'an qeyûm xebatên xwe didin der. Hevseroka HDP'a Sêrtê Ayşe Ekîncî daxistina tabeleya sê zimanî bi bîr xist û destnîşan kir ku wê jin tabelaya sê zimanî dîsa daliqînin. Ekîncî got: "Em HDP bêyî cihêkariya ziman, netew û nijadî bikin em dixwazin jin bi reng û dengê xwe di partiya wan de cih bigirin. Loma em dixwazin hemû jin di bin banê HDP'ê de bibin namzet." 

 

'DÎSA HEVSEROKATÎ' 

 

Hevseroka HDP'a Misircê Esmer Baran jî şara rengîn a di stuyê xwe de nîşan da û got: "Sêrt wekî vê şarê xwedî zimanên cuda ye. Wexta jin destê xwe bidin Sêrtê wê bibe weke vê şarê. Jin ji Sêrtê bawer dikin û hêvîdar in. Bi serketina jinan wê pergala hevserokatiyê dîsa di şaredariyan de pêk bê." 

 

Seroka Meclîsa Giştî ya Bajêr a DBP'î Hatîce Tay jî, diyar kir ku divê jin destê xwe bidin Sêrtê. Tay, diyar kir ku serdema ku wê jin pirsgirêkên xwe bînin ziman û çareser bikin nêz e. Tay, destnîşan kir ku qeyûm rejîma yekzilamî disepînin û divê jin li hemberî vê bixebitin. 

 

'WÊ JIN BI SER BIKEVIN' 

 

Dayika Aştiyê Zeynep Altûntaş jî, anî ziman ku êdî wext e ku jin li Sêrtê bi ser bikevin û got: "Li Sêrtê sê ziman hene. Lê niha ev vîn li şaredariyê tune ye. Çawa jin li kuçe û kolanan bi sê zimanan diaxivin, wê bi têkoşînê ev sê ziman li şaredariyê jî bên axaftin. Li Sêrtê teqez wê jin bi ser bikevin."