STENBOL - Malbata girtiyê nexweşê giran Îlyas Arat ji bo dermankirinê serî li Wezareta Dadê û rêveberiya girtîgehê da.

 

Îlyas Arat ê ji sala 2015'an û vir ve bi îdîaya kuştina Mûsel Gul ku hat gotin endamê DAÎŞ'ê ye û di 21'ê Tîrmeha 2015'an de li navçeya Gazîosmanpaşa ya Stenbolê bi îdiaya ji aliyê Tevgera Ciwanên Demokratîk Welatparêz (YDG-H) ve hat kuştin, hat darizandin û du caran cezayê muebbetê lê hat birîn. Arat niha li Girtîgeha Girtî ya Tîpa T a Bandirmayê ye û rewşa wî ya tenduristiyê nebaş e. Malbata Arat roja 10'ê Hezîranê serî li rêveberiya girtîgehê, Wezareta Edaletê û Komeleya Mafên Mirovan (ÎHD) da û xwest, bi lezgînî wî bibin nexweşxaneyeke bi temamî temîrkirî û ji ber rewşa wî ya tenduristiyê desteka psîkolojîk werbigirin.

 

Di daxwaznameya malbatê de tê gotin ku Arat ev demeke dirêj e bi pirsgirêkên giran ên fîzîkî û psîkolojîk re rû bi rû ye û ev îfade cih girtin: "Beriya niha tedawiya psîkiyatrî dîtiye û bi rêk û pêk dermanan dixwe. Lê belê di rewşa heyî de bi temamî xwe ji jiyana civakî dûr xistiye, vekişiyaye û xwe gihandiye rewşeke welê ku ji aliyê zîhnî ve westiya ye."

 

Malbatê çavdêriyên xwe yên li ser rewşa tenduristiyê ya Arat di serdanan de vegot: "Ev demeke dirêj e nikare xwarinê bixwe û ji ber vê yekê zeyîf dibe. Hîjyenê şexsî ji nedîtî ve tê û bi temamî xwe xwedî dike. Êşa mîdeyê, serêşî û êşên wî yên mayinde hene. Tevî vê yekê jî bi têrkerî destwerdaneke têrker a tibî nayê kirin. Ji aliyê psîkolojîk ve, veqetandina ji jiyanê, bêtevger e, apatî (hesasiyeteke hestewar), dîtin. Nirxandinên psîkologê girtîgehê ne têrker in û giraniya rewşa tenduristiyê ya heyî nîşan nadin."

 

8 MEHAN AGAHÎ JÊ NEGIRTIN

 

Xwişka Îlyas Arat Zehra Arat diyar kir ku wan di sala 2024'an de bi qasî 8 mehan nekarîn xwe bigihînin birayê xwe. "Her cara ku em ji bo ziyaretê diçûn, daxwazname didan me. Di daxwaznameyê de hate diyarkirin ku ji ber nexweşiya xwe nikare ji bo serdanê derkeve ser dikê. Em di wê baweriyê de ne ku di vê pêvajoyê de di aliyê rêveberiya girtîgehê de nelirêtî çêbûye. 8 mehan rêveberî ti agahî neda me. Ne em dikarin bi telefonê biaxivin, ne jî bi rêya parêzerên xwe em dikarin agahiyê bigirin. Serlêdanên me hatin redkirin. Piştî heşt mehan, dema ku em ji bo serdaneke mehane diçûn, bi tesadufî em pê re rû bi rû man û tenê 15 deqeyan me dikarîbû biaxivin. Êşên giran dikişand û zehmetî dikişand."

 

JIYANA WÎ DI TALÛKEYÊ DE YE

 

Zehra Arat anî ziman ku Îlyas Arat tiştên ku di nav 8 mehan de hatiye sere wî bi wan re parve nekiriye û di 10 salên girtîgehê de rastî gelek îşkenceyên fîzîkî û psikolojik hatiye.

 

Zehra Arat wiha dewam kir: "Ne tenê azadiya birayê min hatiye girtin, her wiha rewşa wî ya tenduristiyê jî gav bi gav jê tê girtin. Nexweşê şekir, mîde û êşa hevbeş û êşa serî ya giran e. Her wiha nêzî salek e pirsgirêkên psîkolojîk dijî. Mafê jiyanê yê Îlyas di bin tehdîdê de ye. Ew ne tenê Illyas e; li girtîgehê bi sedan girtiyên nexweş ên mîna wî hene. Xuya ye li goristaneke ku kes dengê wan nabihîze dijîn. Bêyî nêrîn an jî nasnameya siyasî, mafê tenduristî û tedawiyê nikare bê girtin. Rewşa birayê min nebaş dibe û mudaxaleya tibî nayê kirin. Nabe ku mafê tenduristiyê bê taloqkirin. Weke xwişkekê ez ê qîrîna bêdeng a birayê xwe bidomînim. Nabe ku girtiyên nexweş ji nedîtî ve bên. Ev rewş binpêkirina maf û wijdanê mirovan e."

 

Zehra Arat da zanîn ku ew ê serî li hemû rêyên hiqûqî û edlî bidin û wiha got: "Em daxwaz dikin ku birayê me sewqî nexweşxaneyê bê kirin, hemû muayeneyên wî bên kirin." 

 

MA / Omer Îbrahîmoglu