Rêxistina Partiya Wekhevî û Demokrasiyê ya Gelan (DEM Partî) ya Qersê li eywaneke dawetan a bajar bi dirûşma “Dem dema xwebirêxistinkirinê ye” 1’emîn Kongreya Awarte li dar dixe. Hevseroka Giştî ya DEM Partiyê Tulay Hatîmogûllari di kongreya partiyê de axivî. Tulay Hatîmogûllari, bertek nîşanî tayînkirina qeyûman da û got ku tayînkirina qeyûm binpêkirina hiqûqa navxweyî û ya navneteweyî ye. Tulay Hatîmogûllari, qeyûm weke darbeya siyasî nirxand û got; “Ferqa wê ji darbeya leşkerî ya 12’ê Îlonê tune ye.” 

 

'AŞTÎ WIHA NAYÊ KIRIN’

 

Tulay Hatîmogûllari, diyar kir ku mijara qeyûman hemû partiyan eleqedar dike, pirsgirêka her kesî ye û divê hemû kes di çarçoveya têkoşîna hevpar û demokratîk de li dij derkeve. Tulay Hatîmogûllari, wiha domand: “Li rexekî peyamên aştiyê li rexa din qeyûm nabe. Tevî gelê xwe û hêzên demokrasiyê dê têkoşîna me ya li dijî tayînkirina qeyûman bidome. Di destekî de gul, di destê din de kulma jihesin ve aştî nayê kirin.”

 

'KOMKUJIYÊN LI ROJHILATA NAVÎN DIDOMIN’ 

 

Tulay Hatîmogûllari, bal kişand ser geşedanên li Rojhilata Navîn û got ku komkujî, şer û pevçûnên li herêmê didomin. Tulay Hatîmogûllari, wiha pê de çû: “Heman pirsgirêk li Tirkiyeyê jî didomin. Di demeke ku cîhan ji xwe re pergaleke nû ava dike de li Rojhilata Navîn xwîn dirije. Li her derê mirin, şer û pevçûn hene... Pirsgirêka gelan, baweriyan li vê herêmê bi hev re nîne. Bi nîqaş û rageşiyên çêker herêmê ber bi şer ve dibin. Li dijî van êrişan, têkoşîna azadiyê jî didome. Gelê Kurd ê hêja pêşengtiya vê berxwedanê dike. Ev têkoşîn, ji bo hemû gelên herêmê bûye mînak. Ev têkoşîn pir girîng e. Li Sûriyeyê rêveberî guherî û dixwazin pergaleke nû ava bikin. Em dixwazin ku pergaleke hemû gel û bawerî di rêveberiyê de cih digirin, dikarin nasnameya xwe bi awayekî azad bijîn were avakirin. Di vê pêvajoyê de hewceye têkoşîna li Rojava baş were dîtin. Berxwedaneke mezin raber dike.”

 

‘TEVÎ SMO’YÊ ÊRIŞÎ KURDAN DIKIN’ 

 

Di berdewamê de Tulay Hatîmogûllari ev tişt anî ziman: “Gelê Kurd berxwedaneke mezin nîşan dide û jiyaneke nû ava kir. Bi mutabeqeta jiyanê ya bi civakê re hatiye amadekirin, jiyana xwe domandin. Di wê danezanê de tê gotin ku hemû gel û bawerî bi ziman û rengê xwe dikarin azad bijîn. Hebûna jinan a di qada siyaset û cemaweriyê tê de heye, jiyaneke sekûler heye. Divê di rêveberiya Sûriyeya nû de ev peyman hebe, were naskirin û statûya gelê Kurd were qebûlkirin. Mixabin Tirkiye bi destê SMO’yê êrişî gelê Kurd dike.” 

 

PEYAMÊN ABDULLAH OCALAN

 

Têkildarî peyamên Rêberê PKK’ê Abdullah Ocalan jî Tulay Hatîmogûllari wiha got: “Ji 1’ê Cotmehê ve ye li Tirkiyeyê hinek geşedan çêbûn. Her kes pirsa gelo dê bibe pêvajoya aştiyê yan na dike. Ne tenê Kurd, tevahiya Tirkiyeyê vê pêvajoyê dişopîne. Ji aliyekî ve ev baş e û hêviyê dide.” Tulay Hatîmogûllari, diyar kir ku di peyamên Abdullah Ocalan de aştî û çareserî heye û wiha pê de çû: “Em silavên xwe jê re dişînin. Em dibêjin ku dê xwedî li vê peyamê derkevin. Pirsgirêka Kurd heye û tu kes nikare weke pirsgirêka ‘terorê’ pênase bike. Divê çareseriya pirsgirêka Kurd tenê nebe barê ser milên birêz Abdullah Ocalan. Birêz Ocalan dibêje ku divê muxalefet jî erk û berpirsyartiyên xwe bicih bîne. Kurdan û gelên Tirkiyeyê pir êş kişandin. Hêviya me ya herî mezin ew e ku ev xwîn bisekine û em bi hev re jiyanekê ava bikin.” 

 

MAFÊ AZADIYÊ

 

Em baş dizanin ku çareserkirina pirsgirêka Kurd dê ji bo Tirkiye û herêmê pir baş bibe. Lewma divê navnîşana çareseriyê Meclis be û hemû hêzên demokrasiyê û partiyên siyasî xwedî lê derkevin. Şandeya me hevdîtin kir û got; bi rastî jî muxaleft jî di nv de hem civak hem jî partiyên siyasî ji bo çareseriyê amade ne. Ji bo neçareseriyê tu hincet nînin. Lê divê dewlet di mijara çareseriyê de diyaloga li Îmraliyê pêş bixe. Heke wiha bike, gelên Tirkiyeyê û partiyên siyasî amade ne. Ev, derfetekî mezin e. Derfetekî dîrokî ye. Hevdîtin hene lê ev nayê wê wateyê ku tecrîd bi temamî rabûye û pêvajo baş derbas dibe. Her wiha divê mafên tenduristî, ewlehî û azadiyê yên birêz Abdullah Ocalan bên bicihanîn, divê şert û merc bên avakirin da ku bikare bêhtir ji bo aştiyê bixebite.”