AMED - Hevseroka MED TUHAD-FED’ê Pinar Sakik Tekîn diyar kir ku dê kampanyaya “Ji Abdullah Ocalan re azadî, ji bo pirsgirêka Kurd çareseriya demokratîk” di sala nû de jî bidome û wiha got: “Divê her kes ji bo aştiyeke birûmet xwedî li vê kampanyayê derkeve.”
Kampanyaya “Ji Abdullah Ocalan re azadî, ji bo pirsgirêka Kurd çareseriya demokratîk” ku di 10’ê Cotmeha 2023’yan de li 74 navendên cîhanê starta wê hatibû dayin, didome. Di çarçoveya kampanyayê de hem li Kurdistanê hem jî li seranserî cîhanê bi sedan çalakî hatin lidarxistin. Di encama çalakiyên girseyî de piştî 43 mehan ji Rêberê PKK’ê Abdullah Ocalan agahî hatin girtin û biraziyê wî Omer Ocalan pê re hevdîtina malbatî kir. Abdullah Ocalan, di hevdîtinê de got ku tecrîda li Îmraliyê didome û ev peyam da: “Heke şert û merc çêbibin, ez xwedî wê hêza teorîk û pratîk im ku pêvajoya pevçûn û tundiyê derbasî zemîna hiqûqî û siyasî bikim.” Parlamenterên Partiya Wekhevî û Demokrasiyê ya Gelan (DEM Partî) Pervîn Buldan û Sirri Sureyya Onder jî duh çûn Îmraliyê.
'TECRÎD LI HEMÛ GELAN TÊ FERZKIRIN’
Hevseroka Federasyona Komeleyên Hiqûqî û Piştevaniya bi Malbatên Girtî û Hikûmxwaran re ya Medê (MED TUHAD-FED) Pinar Sakik Tekîn, diyar kir ku tecrîda ku ev 26 sal in li dijî Abdullah Ocalan di meriyetê de ye, sepaneke keyfî û derhiqûqî ye. Pinar Sakik Tekîn, wiha got: “Li dijî avakirina civakeke bingeha xwe ji paradîgmaya ekolojîk, wekheviya zayenda civakî û azadîxwaziya jinê digire, di zîhniyeta yekperest, mezhebperest û neteweperest de israr dikin. Ev israr, her ku diçe tecrîdê girantir dike. Ev tecrîda girankirî jî bi xwe re şer, alozî û tundiyê tîne. Tecrîda li ser birêz Abdullah Ocalan, li hemû gelên Tirkiyeyê tê ferzkirin.”
'ÇARESERÎ RAKIRINA TECRÎDÊ YE’
Bi domdarî Pinar Sakik Tekîn anî ziman ku rêya çareseriya krîzên piralî girêdayî rakirina tecrîda li Îmraliyê ye û wiha domand: “Di bingeha van krîzên piralî de pirsgirêka Kurd heye ku divê tavilê bi rêyên demokratîk were çareserkirin. Gelek caran di bin navên cuda hewl dan pêvajoyekê birêve bibin lê tevek jî têk çûn. Tevî vê jî me dev ji çareseriya demokratîk berneda û em her tim amade bûn û me israr kir.”
Pinar Sakik Tekîn bal kişand ser nîqaşên têkildarî “pêvajoya nû” û wiha dirêjî da axaftina xwe: “Ji bo aştiyê divê li Îmraliyê hevdîtin bên kirin. Divê ev ne tenê di gotinê de bimîne. Sedsala ewil a komarê bi komkujiyan derbas bû. Hewceye di vê sedsalê de wiha nebe. Divê tecrîda li ser birêz Abdullah Ocalan tavilê bê rakirin û pirsgirêka Kurd bi rêyên demokratîk were çareserkirin. Heke jidil bin, divê ji ewil bikevin nava pratîkê. Heke aştiyeke birûmet û mayinde were kirin, divê ev bi demê re neyê vehêlandin.”
'DEMA QALA AŞTIYÊ DIKIN ŞER FERZ DIKIN’
Di berdewamê de Pinar Sakik Tekîn bi lêv kir ku di demekî li Tirkiyeyê qala aştiyê tê kirin de bi destê hêzên navneteweyî li Rojhilata Navîn şer tê gurkirin û wiha axivî: “Li Rojava bi pêşengtiya jinan şoreşek pêk hat û ji bo cîhanê bû modêlek. Hêzên navneteweyî niha ji bo hebûna xwe şerekî dimeşînin. Niha li Rûsya-Ûkrayna, Îsraîl-Filistînê û li Sûriyeyê şer heye. Niha hemû hêzên navneteweyî û herêmî li Sûriyeyê pozîsyona xwe diyar dikin. Kurd jî pozîsyona xwe diyar dikin. Rewşa li Rojava dê rewşa navxweyî ya Tirkiyeyê jî zelal bike. Daxwaza me ew e ku tavilê aştî bê kirin û hemû gel bi hev re bijîn.”
Pinar Sakik Tekîn anî ziman ku kampanyaya azadiyê dê di sala 2025’an de jî bidome û axaftina xwe wiha qedand: “Dê kampanyaya me bidome. Em dixwazin aştî çêbibe. Lê di tecrîd û neçareseriyê de israr dikin. Li dijî vê dê israra me jî ya ji bo aştî û çareseriyeke demokratîk bidome. Divê her kes ji bo aştiyeke birûmet û mayinde xwedî li vê kampanyayê derkeve.”
MA / Mujdat Can