STENBOL - Serdozgeriya Komarê ya Stenbolê ji ber ku di çarçoveya sûcên li dijî mirovahiyê de ye, di bûyere îşkenceyê ya nakeve ber demboriyê de, bi hinceta ku 7 sal di ser bûyerê re derbas bûye biryara neşopandinê da.
Hamza Dogrûlê ku di Kanûna 2017'an de li Bahçelîevlera Stenbolê hat binçavkirin û girtin, bi îdiaya "endamê rêxistinê" û "hewldana jiholêrakirina pergala destûra bingehîn" cezayê muebbedê yê giran lê hat birîn. Doğrûl ê li Girtîgeha Ewlehiya Bilind a Antalyayê girtî ye, giliyê polîsên ku 7 sal berê di binçavan de îşkence li wî kiribûn kir, li Serdozgeriya Komarê ya Stenbolê. Serdozgeriya Komarê ya Stenbolê ku giliya Dogrûl a bi rêya parêzera xwe Nagehan Avçîlê di 9'ê Îlonê de kir, ji ber sûcên hatine kirin di çaçroveya sûcên li dijî mirovahiyê de ne û nakevin ber demboriyê, bi hinceta ku 7 sal di ser bûyerê re derbas bûye biryara neşopandinê da.
'4 ROJAN EW NEBIRINE MUAYENEYA EDLÎ'
Di serlêdana parêzer Avçîlê de hat destnîşankirin ku li gorî rapora muayeneya edlî ya Dogrûl, piştî tundiyê li milê wî û bin çavê wî yê çepê ekîmoza hatiye dîtin. Di serlêdanê de hat destnîşankirin ku Doğrûl 7 rojan di binçavan de ji alîkariya parêzer bêpar hatiye hiştin û di 12 rojên binçavan de îşkence lê hatiye kirin û ev yek bi raporên muayeneya giştî ya edlî hatiye tespîtkirin. Di serlêdanê de hatiye gotin ku "Di navbera 14'ê Kanûna 2017'an û 18'ê Kanûna 2017'an de 4 rojan tu raporeke muayeneya giştî ya edlî di dosyeyê de cih negirtine û di rapora 18'ê Kanûna 2017'an de di rapora muayeneya giştî ya edlî de rastî şopên derbkirinê hatiye û ev yek bi awayekî eşkere nîşan dide ku îşkence li Dogrûl hatiye kirin.
'ÎŞKENCE NAKEVE BER DEMBORIYÊ'
Di serlêdanê de bal hatiye kişandin ku dema Dogrûl birine qereqolê şopên derbkirinê li ser laşê wî tunebûne û hatiye diyarkirin ku şopên derbkirinê di dema binçavkirinê de ji ber îşkenceya polîsan çêbûne. Di serlêdanê de hat destnîşankirin ku li gor Qanûna Ceza ya Tirk ev sûc nakevin ber demboriyê û ji ber vê ev daxwaznameya giliyê hatiye berpêşkirin. Di serlêdanê de hatiye xwestin ku qeydên kamerayên wê demê bên lêkolînkirin û doz li kesên tiliya wan tê de heye bê vekirin.
Lê belê Serdozgeriya Komarê ya Stenbolê di 12 rojan de der barê serlêdanê de biryar da. Dozgeriyê wekî hicnet diyar kir ku di ser bûyeran re 7 sal derbas bûne û der barê giliyê de biryara neşopandinê da.
Parêzera Dogrûl Nagehan Avçîlê jî li dijî vê biryara dozgeriyê serî li Dadgeriya Înfazê ya Ceza ya Sulhê ya Stenbolê da. Di serlêdanêd e hat gotin ku demildest biryardayîna dozgeriyê piştrast dike ku lêpirsîneke "çalak" nehatiye kirin û biryara hatiye dayîn li dijî qanûnê ye.
Hat xwestin ku îtiraza bê qebûlkirin û doz bê vekirin.
MA / Omer Îbrahîmoglû