AMED - Di 20’ê Kanûnê de li Girtîgeha Hejmar 2 ya bi Ewlekariya Bilind a Amedê di qawîşan de lêgerîn hate kirin. Di dema lêgerînê de girtî hatin derbkirin û der heqê wan de du lêpirsînên disiplînê yên cuda hatin destpêkirin.
Di 20’ê Kanûnê roja înê de li Girtîgeha Hejmar 2 ya bi Ewlekariya Bilind a Amedê di qawîşan de lêgerîn hate kirin û girtî di hucreyên yekkesî de hatin derbkirin. Di heman rojê de hevdîtina vekirî hebû û malbatan di hevdîtinê de hay ji rewşê bûn. Malbatan têkildarî mijarê serî li Komeleya Piştevaniya bi Malbatên Hikûmxwaran re (TUAY-DER) û Şaxa Komeleya Hiqûqnasên Azadîxwaz (OHD) a Amedê dan û alîkariya hiqûqî xwestin.
Hevjîna girtî Nazim Ocal, Sûltan Ocal da zanîn ku hevjînê wê û hevalên wî hatine derbkirin û wiha got: “Hevdîtin piranî saet derdora 10.40’ê dihat kirin lê em 2 saetan hatin sekinanidn. Em li dijî vê derketin û me pirsa ‘Hûn çima me didin sekinandin’ jê kir. Ji me re gotin; ‘Lêgerîn heye, bisekinin.’ Piştre em girtin hundir. Min ji hevjînê xwe pirsî bê çi bûye. Got; ‘Li qawîşan lêgerîn kirin. Hemû alav û amûrên me belav kirin û pê lê kirin. Ez û hevalên din ên li qawîşa min birin hucreyên yekkesî. Li wir destên min zivirandin û qirika min şidandin. Em li wir hatin derbkirin.’ Keça min xwe avêt stûyê hevjînê min lê hatibû derbkirin û got stû û milên wî diêşin. Lewma dema keça min ew hembêz dikir, jê xwest hinek baldar be.”
MIDÛRÊ GIRTÎGEHÊ HEVDÎTIN NEKIR
Sûltan Ocal, da zanîn ku ev demekî dirêj e binpêkirinên li girtîgehan didomin û wiha pê de çû: “Hevjînê min got; ‘Zilmê li me dikin, bila her kes hay ji vê hebe. Di demên berê de jî pirsgirêk derdixistin lê îcar êdî tundiyê dikin.’ Ji bo pirsgirêkan derxînin tiştên girtî ji kantînê digirin 1-2 hefteyan desteser dikin û diavêjin sergoyê. Kalorîferan hil nakin. Weke xizmên girtiyan me bertek nîşan da û me xwest bi midûrê girtîgehê re hevdîtinê bikin. Lê belê midûr hevdîtin qebûl nekir. Em banga hestiyariyê li raya giştî dikin.”
OHD Û BARO ÇÛN SERDANÊ
Li ser serlêdana malbatan, Baroya Amedê û parêzerên endamên OHD’ê çûn serdana girtiyên duh hatin derbkirin. Parêzerên bi girtiyan re hevdîtin kirin dan zanîn ku di dema lêgerîna qawîşan a di 20’ê Kanûnê de heqaret li girtiyan hatiye kirin, ji pişt ve hatine destkelemçekirin û birine hucreyên yekkesî. Parêzeran, got ku li vir lêgerîna tazî li girtiyan hatiye ferzkirin, solên wan bi darê zorê derxistine, du saetan tazî hatine sekinandin û piştre gef lê xwarine.
DER HEQÊ GIRTIYAN DE LÊPIRSÎN HATE DESTPÊKIRIN
Parêzeran, destnîşan kirin ku piştî hevdîtina vekirî girtî birine nexweşxaneyê lê tevî şopên derbkirinê jî rapor nehatiye nivîsandin. Her wiha parêzeran anî ziman ku derheqê girtiyên hatine derbkirin de bi îdiayên “Lêgerîn asteng kirine” û “Dirûşm berz kirine” du lêpirsînên disiplînê yên cuda hatine destpêkirin.
MA / Şîrvan Şîlan Çîl