Hevserokê Giştî yê Partiya Wekhevî û Demokrasiyê ya Gelan (DEM Partî) Tuncer Bakirhan, di civîna koma Meclisê ya partiya xwe de geşedanên di rojevê de nirxand. 

 

BERTEK NÎŞANÎ BINÇAVKIRINAN DA

 

Bakirhan, bertek nîşanî qedexekirina dirûşma “Jin, jiyan, azadî” da û got ku jinan berteka pêwîst nîşan daye. Bakirhan, wiha got: “Têkoşîna jinan a ji bo jiyaneke bêtundî, bêkedxwarî û ji bo jiyaneke azad, di heman demê de têkoşîna partiya me ye. Em careke din bi hev re dibêjin ‘jin, jiyan, azadî.'” 

 

Bi domdarî Bakirhan bertek nîşanî binçavkirina siyasetmedar, rojnameger û nivîskaran da û xwest ku tavilê bên berdan. 

 

'BI ALÇAXÎ ÎRADEYA DÊRSIMIYAN XESP KIRIN’ 

 

Di berdewamê de Bakirhan anî ziman ku ji sala 2015’an heta niha li Tirkiyeyê bênavber derbe tê kirin û wiha pê de çû: “Ev derbeye ne mîna derbeyên berê ye. Bi tank, tifingan nayê kirin. Vê zîhniyeta derbeker bi tayînkirina qeyûman a li şaredariyên Dêrsim û Pulurê re careke din xwe anî bîra me. Ji ewil cibeyê dadger kete dewrê û piştre jî bi teblîxatekê re bi alçaxî îradeya xelkê Dêrsimê xesp kirin. Begefendî (walî), dixwaze bi lez û bez îradeya xelkê Dêrsimê xesp bike. Dixwaze tavilê nelirêtiyan bike. Dê du mûçeyan bigire, meclisa şaredariyê fesh bike, çavkaniyên şaredariyê pêşkeşî şîrketên nêzî xwe bike û rantê bixwin. Di nava keyfxweşiya vê de ye. Ji dadgehê re nivîsê dinivîse û jê re dibêje tavilê biryarê bide. 

 

DÊRSIMÊ BI HEZARAN KESÊN MÎNA TE DÎT 

 

Qeyûm, ev der Dêrsim e, bi sedan, bi hezaran kesên mîna te dît. Tevî ewqas polîtîkayên zilm û zordariyê jî dev jê berneda. Ma dê bi te re dev jê berde? Dibêje qey dê Dêrsim li gorî fermanên wî û wan xespkaran tevbigere. Hûn ê gelek li benda vê bin. Dêrsim tu caran dev ji îradeya xwe bernade... Doza me Rêya Heq e û em dev ji vê dozê berndin. Derdikevin dibêjin Tirkiyeyeke bêteror. Ya ku jê re dibêjin ‘teror’ ew e ku li şûna hevşaredarên hatine hilbijartin qeyûm bên tayînkirin. Terora esasî qeyûm in. Feraset û zîhniyeta we ya qeyûmperest e. Tayînkirina qeyûm a li îradeya gel teror e. 

 

KURDAN ESAS BIGIRIN

 

Sînor diguherin, îktîdar diguherin, zîhniyet û rejîm diguherin. Lê di tevahiya dîrokê de tiştek heye ku qet neguheriye; li Rojhilata Navîn heta kurd esas neyên girtin guherîn nabe. Di serdana Alparslan de jî wisa bû, di serdana Mûstafa Kemal de jî wisa bû. Tu hesabên jeopolîtîk û îktîdarên kurdan esas nagirin, nikarin li Rojhilata Navîn bi ser kevin. Yên esas digirin jî meşa xwe didomînin. Lewma em bang li îktîdarê dikin ku kurdan esas bigirin. 

 

Bahçelî, Erdogan û Hakan Fîdan tên û diçin dibêjin ‘gef li ser erdnîgariya me heye.’ Ê baş e wisa bifikire ku ge li ser hene. Dê çawa vê gefê ji holê rakî? Ma dê bi tunehesibandina pirsgirêka kurd û destkeftiyên kurdan wisa bikî? Bi xwarina gefan a li kurdan dê bikî? Bi tu awayî bersiva van pirsan nadin. Tenê gotinên xwe dizivirînin. Bi tu awayî bersivan nadin rojevên esasî. Di demeke Rojhilata Navîn dikele de mixabin ev îktîdar hundirê welêt jî dikelîne. 

 

DI HEWZA VALA DE SOBERÎ NABE

 

Di rewşa heyî de tişta jê re dibêjin eniya hundir çi ye; qeyûm e. Li gorî tiştên niha diqewimin dibêjim; tişta jê re dibêjin eniya hundir dijminatiya li aştiyê û tesfiyekirina siyaseta demokratîk. Bi girtina hevşaredaran hûn nikarin eniya hundir ava bikin. Hewzeke vala nîşanî me didin û dibêjin ‘soberiyê bikin.’ Di hewza vala de soberî nayên kirin. 

 

TECRÎDÊ RAKIN 

 

Dibêjin; ‘Bi gotinên birêz Ocalan nakin, DEM Partî ne li gel çareseriyê ye.’ Ma dereweke wiha dibe? Ma êdî kî nizane bê ka DEM Partî li ku disekine. Di hizûra 85 milyon kesan de em ji we dipirsin; Ocalan çi got û çi xwest? Em bi vê nizanin, gelo hûn dizanin? Wê demê em ê çawa bizanin ka li birêz Ocalan hatiye guhdarîkirin an na. Dibêjin ka ji ewil tecrîdê rakin bê ka çi dibêje. Tecrîd heye, dê ji bo 6 mehên din biryara qedexeya hevdîtinê bidin û piştre jî rabî bibêjî li Ocalan guhdarî nakin. 

 

Em nizanin ka Ocalan çi gotiye. Ka tecrîdê rakin em bibînin bê çi dibêje. Wê demê dê diyar bibe ka lê tê guhdarîkirin an na. Êdî dev ji van polîtîkayên derexlaqî berdin. 

 

DÊ SERLÊDANÊ BIKIN 

 

Îro jî di koma MHP’ê de li ser hate axaftin. Lê piştrast bin ku me amadekariyên xwe kiribûn. Wisa xuya dike ku aqilê ji bo çareseriyê carnan mîna hev dixebite. Em ê tevî hevseroka xwe Tulay Hatîmogûllari îro ji bo çûna Îmraliyê, hevdîtina bi birêz Abdullah Ocalan re serî li Wezareta Dadê bidin. Heke jidil bin dê astengiyên li pêşiya serlêdanê rakin. Ne tenê em, divê hemû kesên aştîxwaz, demokrat, rewşenbîr, nivîskar, hunermend û nûnerên saziyên demokratîk biçin serdana Îmraliyê.”