Tirkiye di êrişên li ser Bakur û Rojhilatê Sûriyeyê de gelê sivîl, depoyên avê, tesîsên ceyran û petrolê û qadên jiyanê hedef digire. Di van êrişan de zarok û jin jî di nav de bi dehan kesan jiyana xwe ji dest dan.

 

Rojnamevan Veysî Sarisozen êrişên li ser Bakur û Rojhilatê Sûriyeyê nirxand û got ku divê her kes li hemberî van êrişan rabe. 

 

Sarisozen bilêv kir ku êrişên Tirkiyeyê yên li ser Bakur û Rojhilatê Sûriyeyê û êrişên Îsraîlê yên li ser Filistînê di çarçoveya planên NATO'yê de tên kirin. 

 

Sarisozen bilêv kir ku her du dewlet jî "qereqolên pêşketî" yên girêdayî NATO'yê ne li Rojhilata Navîn û got ku di bingeha êrişên Tirkiyeyê yên li ser Rojavayê û êrişên Îsraîlê yên li ser Filistînê de armancên DYA'yê yên li hemberî Îranê hene. Sarisozen wiha domand: "DYA anku NATO, berî ew û Îranê di eniyan de li ber hev rabin, yek jê dixwaze Filistînê, Hizbullahê û Hamasê û yê din jî dixwaze Rojavayê û Qadên Parastina Medyayê tesfiye bike. Ger ev bên tesfiyekirin, dê planên xwe yên stratejîk ên li hemberî Îranê têxin dewrê. Lewma hem teqîna li Enqereyê hem jî êrişa Hamasê ya li hemberî Îsraîlê, ji bo polîtîkayên wan di wesfê hincetan de ne." 

 

Sarisozen bilêv kir ku NATO rola temamkirina şerê cîhanê yê sêyem daye van her du dewletan û got: "Ev polîtîkayên şer, polîtîkayên entegrekirina bi NATO'yê ne. Ez wiha difikirim ku divê mirov ji pencereyeke berfirehtir li van geşedanan mêze bike." 

 

Rojnamevan Veysî Sarisozen

 

HEVŞIBIYA REWŞA ÎSRAÎL Û TIRKIYEYÊ

 

Sarisozen gotinên Wezîrê Karên Derve yê Tirk Hakan Fîdan ku gotibû "Tesîsên sered û binerdê, tesîsên enerjiyê ji niha û pê ve armanca me ya rewa ne" bibîr xistin û got ku ev êriş û êrişên Îsraîlê yên li hemberî Filîstinê "sûcên şer" in. Sarisozen got: "Eşkere dibêjin 'em ê mirovên sivîl bikujin.' A rast rêbazên Îsraîl û Tirkiyeyê ji hev ne cuda ne." 

 

Sarisozen destnîşan kir ku Bakur û Rojhilatê Sûriyeyê jî li ser "Rêya Sêyem" dimeşin û ev jî berhemeke tevgera azadiyê ya kurd e û got: "Rasterast li dijî emperyalîzmê têdikoşe. Ev emperyalîzm, emperyalîzma herêmî ya kurd e û li dijî artêşa herî mezin a duyem a NATO'yê şer dike. Lewma piştevaniya ji bo Rojavayê rasterast piştevaniya ji bo antîemperyalîzmê ye." 

 

'TIRKIYE MEHKÛMÊ NEENCAMGIRTINÊ YE'

 

Sarisozen helwesta DYA'yê ya ji bo êrişên Tirkiyeyê yên li ser Bakur û Rojhilatê Sûriyeyê jî nirxand û got ku DYA 'ji bo li herêmê bimîne muhtacî kurdan e " û ji ber vê li dijî êrişan e. Sarisozen wiha domand: "DYA, Kurdistaneke bêyî PKK'ê wekî cihekî avakirina hegemonyaya xwe difikire. Rojava jî sûdê ji vê hevsengiya di navbera hêzên emperyalîst de digire. Helbet ev ne tifaqeke stratejîk e. Lewma dê Tirkiye nikaribe bi van êrişan Rojavayê teslîm bigire. Ne cîhan ne jî Tirkiye ji bo vê ne musaîd in. Tirkiye niha di nava krîzeke mezin de ye, lê belê heya ji destê wê bê dê zirarên mezin bide Rojavayê." 

 

Sarisozen bilêv kir ku tevî hemû êrişan jî gelê Rojavayê dest ji xaka xwe bernade û wiha dawî li axaftina xwe anî: "Rojava niha navendeke şoreşger e. Ji lew re Kurdistan di şerê cîhanê yê sêyemîn de di pozîsyoneke navendî de ye. Kî bibe serdestê Kurdistanê dê bibe serdestê Rojhilata Navîn. Her du kampên emperyalîst, ji ber şoreşa Rojavayê gavên bi teredut diavêjin. Lewma îro Rojava xwe disipêre hêza xwe û xwedî derfeta xweparastinê ye. Tirkiye mehkûmê neencamgirtinê ye." 

 

MA/ Ergîn Çaglar