NAVENDA NÛÇEYAN - Nûnertiya Rêvebiriya Xweser a Bakur û Rojhilatê Sûriyeyê ya Silêmaniyê ragihand ku di êrişên Tirkiyeyê yên meha dawî de 39 kesan jiyana xwe ji dest daye.

 

Nûnertiya Rêvebiriya Xweser a Bakur û Rojhilatê Sûriyeyê ya Silêmaniyê û Eniya Piştevaniyê ya Rojavayê têkildarî êrişên Tirkiyeyê de daxuyanî dan. 

 

Li ser navê Nûnertiya Rêvebiriya Xweser a Bakur û Rojhilatê Sûriyeyê ya Silêmaniyê Evîn Swêd axivî. 

 

Evîn Swêd êrişên Tirkiyeyê yên li ser Herêma Kurdistana Federe û Bakur û Rojhilatê Sûriyeyê şermezar kir û got: “Ji 19’ê Tîrmehê heta 19’ê Tebaxê dewleta Tirk bi ÎHA'yan êrişî herêmên Bakur û Rojhilatê Sûriyeyê kir. Ji 30 kesên ku di encama êrişan de şehîd bûbûn 8 jê jin, 7 zarok û 4 jî endamên asayîşê bûn."

 

Her wiha Evîn Swêd diyar kir ku di êrişan de 5 fermandarên ku di şerê li dijî DAIŞ'ê de roleke girîng lîstine jî jiyana xwe ji dest dane.

 

Swêd, bal kişand ser wê yekê ku Tirkiyê û hêzên girêdayî wê Şehba, Eyn Îsa, Kobanê, Zirgan, Til Temir, Dirbesiyê, Tirbespiyç û Girê Spî û zêdetirî 45 gund bi tank û obusan bombebaran kirine. 

 

Evîn Swêd anî ziman ku di encama topbaranan de 2 jê zarok 9 kesan jiyana xwe ji dest dane û 48 kes jî birîndar bûne û got: “Di encama topbaranên dewleta Tirk a dagirker de 39 welatiyên me şehîd bûne û 73 welatiyên me jî birîndar bûne."