HATAY - Hevserokê Giştî yê HDP’ê Mîthat Sancar ê li navçeya Erzînê axivî, qala şerê gengaz ê Sûriyeyê kir û got: “Em dixwazin aştiyeke rast û birûmet were welat. Di pêşerojê de diyariya me ya herî mezin a ji bo gel wê bibe aştiyeke rast û birûmet.”

 

Hevserokê Giştî yê Partiya Demokratîk a Gelan (HDP) Mîthat Sancar wê bi dirûşmeya “Çareserî em in, ji şer û mêtîngeriyê re na” du rojan li Hatay û navçeyên wê bi nûnerên rêxistinên sivîl ên civakî, esnaf û gel re were bahev. Sancar ewilî li navçeya Erzînê ya Hatayê bi gel re civiya. Parlamenterên HDP’ê Fatma Kûrtûlan û Tulay Hatîmogûllari, endamên partiyê û gel Sancar ê bi rêya bejahiyê hate Hatayê li turnîkeyên otobana Erzînê bi çepikan û tilîliyan pêşwazîkirin. Welatiyan bi çepik û îşareta serkeftinê piştgiriya Sancar ê bi konvoyê li navçeyê turek avêt kirin. Sancar dû re hate pêş avahiya Rêxistina HDP’a Erzînê û li vir bi gel re civiya. 

 

Welatiyên ji Osmaniye, navçeyên Doryol û Îskenderûnê jî tev li civîna gel bûn û girseyê eleqeyeke zêde nîşanî Sancar dan. Girseyê li ber muzîka dihat lêxisitn govend gerand. Li qadê pankartên “Çareserî em in, ji şer û dagirkeriyê re na” , “Li dijî îstîsmar, înfaz û qeyûman em hene” , “Tecrîd sûcê mirovahiyê ye” û posterên Aysel Tûglûk û Denîz Poyraz hatin daliqandin. Girseyê her tim dirûşmeyên “Em ê bi berxwedanê qezenc bikin” û “HDP gel e gel li vir e” berz kirin. 

 

‘EM HDP NE LI HER DERÊ NE’

 

Sancar, ê li pêş avahiya HDP’a Erzînê ji gel re axivî, qala êriş û astengkirinên li ser partiya xwe kirin û wiha got: “Her cure rê diceribînin, ji bo ku me asteng bikin dozên komployê vedikin, her roj bi operasyonên nû rêveberên me binçav dikin, digirin. Lê li dijî wan gelekî bi israr bi bawerî têdikoşe heye. Em qet ne bitenê ne, em ê mezintir bibin û rêyên mezintir bimeşin. Ji her pirsgirêka vî welatî re em ê çareseriyê bînin. Di serî de em dizanin ku serkeftin di têkoşîna li dijî vê pergala talankirinê de derbas dibe. We bihevrebûna gel vê pergalê biguherîne. Em ê xwe bigihînin her çar aliyê Tirkiyeyê. Em bi biryar in. Tu hêz nikarin wê civînên me yên gel asteng bike. Kesên dixwazin dijminatiyê bêxin nava gelan wê bi sernekevin, ji ber ku HDP heye. Heta ku HDP hebe wê nefret û dijminatî ji holê rabibe. Em soza vê didin.”

 

‘EM Ê BI HEV RE SERBIKEVIN’

 

Sancar ê got “Me di kongreya xwe de soza vê dabû. Me gotibû çareserî em in soza me heye” axaftina xwe wiha domand: “Binêrin, li Erzînê gelek pirsgirêkên hûn dijîn. Haya me ji zehmetiyên karkerên çandiniyê yên li Erzînê heye. Em hemûyan dizanin. Ji bo hemûyan jî çareseriyên me hene. Mafê kedê wê bi rûmetî bê radestkirin. Hemû karkerên çandiniyê, karkerên ku li vî welatî di nava şert û mercên herî zehmet de dixebitin in. Me ev jî di dema serdana konên karkerên çandiniyê yên demsalî de dît. Em ê van hemû pirsgirêkan bi hêza yekbûyî û têkoşîna hevpar a kedkaran teqez çareser bikin. Em ê teqez mafê kedkaran û daxwaza wan a jiyana bi rûmet pêk bînin. Tenê em dikarin vê bikin, em dikarin her tiştî bi hev re bikin. 

 

DESTNÎŞANKIRINA TÊKOŞÎNA  HEVPAR

 

Ev hikûmet ji qedexeyan hêvî dike zimanan û konseran qedexe dike. Heta li ser kêf û şahîyên ciwanan jî zilmê dike. Bi qedexe û zextan hûn nikarin ciwanan bidin sekinandin. Bi hewldanên asîmîlasyonê re hûn nikarin nasname û baweriyan bi rêya zilmê asteng bikin. Ji ber ku bi milyonan mirov hene ku welatekî ku her gel wê lê azad û wekhev bijî biafirîne, hemû bawerî wê wekhev û azad bin û her roj bi sed hezaran û milyonan wê li van milyonan were zêdekirin. Ji ber vê yekê wê bi ser nekevin, wê bi ser nekevin. Binerin, her devera welêt veguheriye qada talanê. Dibêjin enflasyon ji sedî 80 ye, lê hûn dizanin rastî ji sedî 150-160 e. Hejarî serê xwe girtiye û çûye. Xwezayê talan dikin. Ji bo çi? Ji bo veguhastina çavkanîyên zêdetir bo kulmekî sermayedaran.  Erzîn wargeha narinciyeyê ye, ji sedî 20 narinciye yên li Tirkiyeyê li vir tên hilberandin. Baş e ev hikûmet çi dike? Hewl dide li vir santrala petrokîmyayê ava bike. Li perava Bûrnazê. Santraleke ku wê ji bo madeyên xam ên plastîk hilberîne. Encam dê bibe kêmbûna hilberîna narinciyeyê. Quncikeke tûrîstîk a mîna peravên Bûrnazê wê hilweşe. Ava binê erdê wê jehrî bibe, ji bo kê û ji bo çi ye? Pîşesaziya qirêj wê jiyana paqij a li vir tune bike. Lê belê gelê Erzîn û hemû gelên Antakyayê li dijî vê projeya qirêj a pîşesaziyê têkoşîna hevpar mezin dikin. Berê jî hewl da projeyên bi heman rengî bixe meriyetê. Ji bo 4 santralên komirê xebat bi rêve birin. Lê we bi têkoşîna hevpar hemû sekinandin. Tu kes nikare gelê li ax, av, hewa, ked û rûmeta xwe xwedî derdikeve têk bibe. 

 

ÇARESERÎ EM IN 

 

Erê HDP gel e. Vîna gelan e, mala têkoşîna hevpar e, di baweriyên xwe de cihê hevpar ê berxwedanê ye, warê têkoşîna azadiyê ye. HDP hûn in, HDP gel in, HDP rêyeke mezin e ku ji her baweriyê mirov ji bo siberoja xwe têdikoşin. Tişta ku gotina HDP’ê gel e ev e. Yekkirina têkoşînê û li her derê hatina cem hev, yekane rêya guhertina vê desthilata talanker, şerxwaz e. Têkoşîna xwezayê ya li vê derê, wê bi têkoşîna daristanên Akbelenê yên li Mûglayê re bibe yek.  Têkoşîna parastina daristanên li Akbelenê wê bi têkoşîna li dijî komkujiya daristanan a li Şirnexê re bibe yek. Divê bibe yek. Ên ku çemên Artvînê diparêzin û yên ku li Wanê çeman diparêzin divê werin cem hev, ew ê werin. Ev hatina gelhev a mezin wê hem dawî li talan, hem jî derew û şêlanê bîne. Em soz didin gelê xwe. Soza me heye ku em çareserîyan hilberînin. Em dibêjin çareserî em in. Em ê vê çareseriyê bi hêza we pêk bînin. 

 

POLÎTÎKAYÊN ŞER ÇAVKANIYA HERÎ MEZIN A MÊTÎNGERIYÊ NE 

 

Çavkanî jî pir in. Bi garantiya Xezîneyê re bi milyaran lîre vediguhêze otoban, balafirgeh û gelek sazî, dezgeh û tesîsên din. Em heqê rêya ku em jê derbas nebûne, balafirgeha ku em lê ne daketin, didin. Garantiya xezîneyê dane şîrketên belavkirina elektrîkê û em heqê elektrîka ku em bikarnaînin didin. Em ê van çavkaniyan ji wan kulmeke sermeyedaran bistînin û bidin gel. Çavkanî heye. Gelo hûn dizanin ku windakirina çavkaniyên herî mezin di siyaseta şer de li ku derê ye. Ev hikûmet bi gotina şerê li welat şerê li herêmê çavkaniyên welat ji çek û mirinê re vediqetîne. Lê belê, dema ku hûn dest ji polîtîkayên şer berdin, dema ku hûn çavkaniyên ji bo şer hatine veqetandin li kedkarên vî gelî û xizanan belav bikin, wê li vî welatî keyfxweşî zêde bibe. Ji ber vê yekê, polîtîkaya şer çavkaniya herî mezin a mêtîngeriyê ye. Eger em bixwazin dest ji kedxwariyê berdin, eger em bixwazin dest ji talan û şêlanê berdin, em ê bi hev re li dijî polîtîkayên şer derkevin. Heta ku em hemû bi hev re li dijî polîtîkayên şer dernekevin, em nikarin sîstema talanker û derewan a vê hikûmetê rawestînin. Banga me li her kesî ye. 

 

SOZA ME JI GEL RE HEYE, LI VIR JÎ ÇARESERÎ EM IN

 

Niha jî dibêjin ku qaşo em ê bi Sûriyê re dest bi diyalogê bikin. Lê armanc ew e ku operasyoneke leşkerî li Bakur û Rojhilatê Sûriyê pêk were. Yanî ji bo şerê li dijî Kurdan dewam bike, bi her kesî re dikevin nava danûstandinan. Car li Soçîyê ye car li Tehranê, hûn dibînin ku bi derewan propagandayeke çawa dikin. Dibêjin em ê li Sûriyeyê bi hikûmetê re li hev bikin. Eger vê bikin, wê ne ji bo aştiyê, polîtîkayên xwe yên şer li vir bimeşînin. Lê belê gel bi vê naxapin. Kurd, ereb, asûrî-suryanî, çerkez û hemû gelên din ên li vî welatî dijîn hemû bi lîstikên şer ên AKP'ê dizanin û bi hev re xwedî wê îradeyê ne ku van planên şer xera bikin. Di vir de divê em têkoşîna herî berfireh a li dijî şer a li vê civakê biafirînin. Em dixwazin aştiyeke rast û birûmet were welêt. Diyariya me ya herî mezin a ji bo gelan di pêşerojê de wê bibe aştiyeke rast û birûmet. Em ê li ser pêşerojeke demokratîk a ku hurmetê nîşanî vîna gelan a li ser bingeha wekheviya gelan ji bo tevahiya herêmê tê, aştiya herêmê ava bikin. Li vir soza me ji gel re heye û li vir çareserî em in. 

 

EM Ê SERBIKEVIN

 

Hûn heta vê saetê li ber germê man, spas ji bo hebûna we hemûyan. Her dilopek xwêdana ku ev germahî diherikîne di dilê me de kom dibe. Ev dil wê ewqas bi coş be ku hemû qirêjiyên li vî welatî paqij bike. Talankirina her cure komployên qirêj jî wê plana şer a kedxwariyê pûç bike. Ez ji bo xwêdana we û vê vîna we spasîya we hemûyan dikim. Weke ku em her tim dibêjin, ji me bawer bikin xwişk û bira em ê teqez bi ser bikevin. Em mafdar in, bi biryar in, dilsoz in, heta ku em bi hev re bimeşin em ê bi ser bikevin. Serkeftin a gelê me ye.”