STENBOL - Dayikên Şemiyê, bi taybetî bêdengiya saziyên hiqûqê ya li dijî astengî û zextên li hemberî 900’emîn çalakiya wan a hefteya borî li Qada Galatasarayê şermezar kirin û gotin: “Em dest ji lêgerîna windayên xwe jî û Galatasarayê jî bernadin.”
Dayikên Şemiyê bi daxwaza ku aqûbeta xizmên xwe yên di bin çavan de hatine windakirin bipirsin û faîlên wan bên cezakirin, 901’emîn çalakiya xwe ya her hefte li dar dixin bi awayekî online pêk anîn. Di çalakiya vê hefteyê de bal hat kişandin ser binçavkirin û astengiyên Dayik/Mirovên Şemiyê ya hefteya 900’emîn a li Qada Galatasarayê li dar xistibûn.
Daxuyaniya çapemeniyê ji aliyê birayê Hayrettîn Eren ê 42 sal berê di binçavan de hat windakirin, Îkbal Eren ve hat xwendin. Eren, bi bîr xist ku di civîn û xwepêşandanên ku organîze dikin de mafê gel heye ku bi awayekî azad cihê xwe hilbijêrin û wiha got: "Ji ber ku li Qada Galatasarayê çalakî kirin rastî helwesta dijminane ya hikûmetê hatin. Desthilat hewl dide bi polîtîkayên zext û tundiyê me bêdeng bike. Lê me her carê rêyek dît ku em gotina xwe bibêjin.”
BERTEK NÎŞANÎ BÊDENGIYÊ DAN
Eren, bi bîr xist ku ji bo hêsankirin û parastina kombûnên aştiyane mecbûriyeteke dewletê heye û diyar kir ku ev 4 sal in ji aliyê Qeymeqamtiya Beyoglûyê ve bi awayekî keyfî pêşî li çalakiyên wan tê girtin. Eren, da xuyakirin ku qanûn li dijî wan weke ‘amûreke çavtirsandinê’ tê bikaranîn û got: “Bi tinehesibandina Destûra Bingehîn re pêşî li me tê girtin ku em mafên xwe yên bingehîn û azadiya xwe bi kar bînin.” Eren, bertek nîşanî fakulteyên hiqûqê, navendên mafên mirovan ên fakulteyan, kursiya makeqanûnê û Yekitiya Baroyên Tirkiyeyê yên li dijî vê rewşê dengê xwe dernexistin dan.
Eren, destnîşan kir ku mafê kombûna aştiyane pîvana demokrasiyê ye û bi lêv kir ku cihê mafê kombûnê tê astengkirin nikare qala hiqûq û demokrasiyê bê kirin.
DAXWAZÊN DAYIKÊN ŞEMIYÊ
Eren, anî ziman ku ew ê li dijî hemû astengiyan ji bo xizmên xwe yên di bin çavan de hatine windakirin dest ji daxwazên xwe yên rewa bernedin û wiha berdewam kir: “Daxwaza me zelal û bênîqaş e; Em Tirkiyeyeke ku tundiya dewletê ji şeweyeke rêveberinê derketî dixwazin. Em Tirkiyeyeke demokratîk dixwazin ku aqûbeta mirovên me yên di binê çavan de hatine windakirin lê diyar bibe, fail û berpirsyar li pêşberî dadgeriyeke adîl hesab bidin û windayên di binê çavan de careke din rû nede dixwazin.”
BANG
Eren, da xuyakirin ku çiqas sal derbas bibin jî ew ê dev ji daxwaza edaletê û çalakiya ji bo windahiyên xwe bernedin û axaftina xwe bi van gotinan bi dawî kir: “Di hefteya me ya 901’emîn de em bang li her kesên daxwaza Tirkiyeyeke demokratîk, azad, wekhevîxwaz û adîl dikin ku di kesayeta Dayikên Şemiyêde mafê kombûna aştiyane biparêzin. Di serî de baro, em bang li rêxistinên hiqûqê dikin ku peywîra xwe bi cih bînin.”