Li bajar û navçeyên bakurê Kurdistanê û metropolên Tirkiyê jin îsal bi dirûşma “Dem dema azadiya jinan e” 8’ê Adarê Roja Jinan a Cîhanê pêşwazî dikin. Di çarçoveya çalakî û şahiyên 8’ê Adarê de îro jî jin lig elek bajar û navçeyan daketin qadan û banga têkoşîna li dijî êrişên ser jinan kirin. 

 

Çalakî bi pêşengiya aktîvîstên Tevgera Jinên Azad (TJA) û Meclîsa Jinan a HDP’ê hatin lidarxistin. Jinan di çalakiyan de peyamên xurtkirina têkoşîna li dijî tundiyê dan û daxwaza azadiyê kirin û gotin: “Ji bo azadiyê em her derî veguherînin qada berxwedanê.”

 

MÊRSÎN 

 

Aktîvîstên TJA û Meclîsa Jinan a HDP’ê ya Mêrsînê bi wesîleya 8’ê Adarê şahî li dar xist. Gelek jin beşdarî şahiyê bûn. Piştî axaftinên siyasetmedaran stranbêj Mizgîn Tûran strî û jinan govend gerand. Jinan dirûşm berz kirin. 

 

RIHA 

 

Aktîvîstên TJA û Meclîsa Jinan a HDP’ê ya Rihayê jî di çarçoveya çalakiyên 8’ê Adarê de li navçeya Xelfetî şahî li darxistin. Şahî li ber avahiya HDP’a Xelfetiyê pêk hat, her çiqas polîsan xwest şahiyê asteng bikin jî lê jinan şahiyan xwe li dar xist. Jinan govend gerand û şahiya xwe pêk anîn. Parlamenter Ayşe Surucu axivî û bal kişand ser tecrîdkirina Rêberê PKK’ê Abdullah Ocalan û got divê êdî tecrîda li ser Ocalan bi dawî bibe û azadiya wî pêk were. 

Şahî li ber stranên Koma Aryen û gerandina govendê bi dawî bû. 

 

ŞIRNEX  

 

Şaredariya Silopiya jî bi wesîleya 8’ê Adarê bernameya taştê li dar xist û gelek jin beşdarî çalakiyê bûn. Di çalakiyê de axaftin hatin kirin. Çalakî bi berzkirina dirûşmeyan bi dawî bû. 

 

ÎZMÎR

 

TJA, Komeleya Girtî û Xizmên Girtiyan a Egeyê (EGE-TUHAYDER), Komeleya Kesên Xizmên Xwe Winda kirine a Anatoliyê (ANYAKAY-DER), bi wesîleya 8'ê Adarê li avahiya ANYAKAY-DER'ê civîna jinan li dar xist. Dayîka Denîz Poyraz a li avahiya HDP'ê ya Îzmîrê hat qetilkirin Fehîme Poyraz û gelek jin beşdarî civînê bûn û axaftin hatin kirin. 

 

ÊLIH  

 

Aktîvîstên TJA’yê yên Êlihê di çarçoveya çalakiyên 8’ê Adarê de serdana goristanan kirin. Berdevka Meclîsa Jinan a HDP’ê Ayşe Acar Başaran û gelek jin li hev civiyan û serdana goran kirin. Jin piştî serdana goristanan çûn bazara taxa Cûdiyê û banga beşdariya mitînga 8’ê Adarê kirin.