Şaxên Egîtîm Senê yên Amedê, dê di çarçoveya 20’ê Mijdarê Roja Mafên Zarokan a Cîhanê de hin çalakiyan li dar bixe. Di çarçoveya çalakiyan de li ser navê Ceylan Onkol a 12 salî ku di sala 2009’an de li Licêya Amedê bi topa hawanê hat qetilkirin pêşbaziya wêneyan hat destpêkirin. Di pêşbaziyê de du kategorî hene; yek jê kategoriya xwendekarên dibistana seretayî ya din jî kategoriya dibistana navîn e. Dîroka dawîn a serlêdanê 17’ê Mijdarê ye. 

 

Şert û mercên beşdarbûyînê ev in:

 

* Wêneyên bên şandin divê li ser kaxezên ebata wan 35*50 hatibin çêkirin, 

 

*Xwendekarên beşdarî pêşbaziyê bibin dikarin boyaxên pastel, boyaxên avî, boyaxa guajê, boyaxa zuha hwd. bi kar bînin, 

 

* Herî dawî wêne saet heta 18.00’ê 17’ê Mijdarê wê bên qebûlkirin û divê ji şaxên Egîtîm Sen ên Amedê re bên şandin, 

 

* Wê encam di 20’ê mijdarê Roja Mafên Zarokan a Cîhanê de bên daxuyandin, 

 

* Wê di kategoriyên dibistana seretayî û navîn de, taximên eşofmanan û pêlavên sporî diyarî 6 xwendekaran bên kirin, 

 

* Divê li pişt wêneyan nav û paşnavê xwendekar, pola xwendekar, hejmara telefonê, temen, hejmara pêlavê, nav-paşnav û hejmara telefonê ya mamosteyê xwendekra/ê bê nivîsandin. 

 

Her wiha Şaxa Egitim Sen a Êlihê jî, wê bi navê “Bi çavê zarokekî aştî” ji bo bîranîna Muhammed Veysel Atilgan ê 9 salî ku di 10’ê Cotmeha 2015’an de di komkujiya Gara Enqereyê de jiyana xwe ji dest da, pêşbaziya wêneyan li dar bixe. Wê xwendekarên dibistana seretayî û navîn karibin beşdarî pêşbaziyê bibin. Hat diyarkirin ku wê xwendekar heta 20’ê Mijdarê karibin serî lê bidin. 

 

Dê xelata pereyî li 3 xwendekarên têkevin dereceya ewilîn bê belavkirin. Wê encam di 4’ê Kanûnê de bên daxuyandin.