ENQERE – Berdevka Polîtîkayên Perwerdeyê ya HDP’ê Sevtap Akdağ Karahali, bi munasebata salvegera mirina siyasetmedar û zimanzan Celadet Elî Bedîrxan daxuyaniyek da û ev tişt got: “Li dijî polîtîkayên pişaftinê, çand û ziman em Celadet Elî Bedîrxan bi rêzdarî bi bîr tînin.”

 

Berdevka Komîsyona Huner, Çand, Werzîş û Polîtîkayên Perwerdeyê ya HDP’ê Sevtap Akdağ, bi munasebata salvegera mirina siyasetmedar û zimanzan Celadet Elî Bedîrxan daxuyaniyeke nivîskî da. Akdag, diyar kir ku Celadet Elî Bedîrxan li pey xwe mîrateyeke mezin hiştiye û wiha got: “Ji ber vê yekê em di salvegera 69’emîn mirina wî de Celadet Elî Bedîrxan bi rêzdarî bi bîr tînin.”

 

EMRÊ XWE BEXŞAND

 

Akdag, bi bîr xist ku Celadet Elî Bedîrxan li gel sirgunê jî ji bo hebûn û nasîna mafên kurdan li her qadê têkoşiyaye û berxwedanên ku ji bo vê armancê derketin holê paşguh nekiriye.  Di berdewamê de Akdag, bal kişand ser xebatên ji bo zimanê kurdî û xebatên wêjeyê yên Celadet Elî Bedîrxan û derbarê mijarê de ez tişt anî ziman: “Di 15’ê gulana 1932’an de Kovara Hewarê derxistiye û ronakbirên kurd ên mîna Elî Bedirxan, Osman Sebrî, Nuredîn Zaza, Qedrî Can û Cegerxwîn gihandiye hev. Di hejmara 27’an a kovarê de ji bo ciwanan ev titş dibêje: “Kurdîtiya bê ziman rêzgirtinê ji mirov re çênake, ev ji bo me şermeke mezin e. Emrê xwe ji bo pêşxistina zimanê kurdî bexşand. Ji bilî derxistina kovarê ji bo standartîzasyon û pêşxistinê kurdî jî bingeke baş ava kir.”

 

BANGA XWEDÎ DERKETINA MÎRATEYA BEDÎRXAN

 

Di dawiya daxuyaniya xwe de Akdag, pêkanînên qeyûm ên li dijî zimanê kurdî jî bi bîr xist û ev bang kir: “Li dijî polîtîkayên pişaftinê, çand û ziman, di şexsê Celadet Elî Bedîrxan de hemû kesayetên kurd  bi rêzdarî bi bîr tînin. Em bang li gelê xwe dikin ku ji mîrateya wan fêm bikin û bigihînin nifşên nû.”