Ji komîsyonê re ragihandin: Divê hevdîtin bi Abdullah Ocalan re bê kirin

2025-08-29 09:07:03


	İZMÎR - Endama Lijneya Rêveber a ÎHD'ê Vetha Aydinê diyar kir ku wan ji komîsyonê re ragihandiye ku divê sererastkirinên qanûnî ji bo jiholêrakirina binpêkirinan, bi taybetî yên der barê "mafê hêviyê" de werin çêkirin û divê hevdîtin bi Abdullah Ocalan re were kirin.

	"Komîsyona Hevgirtina Neteweyî, Xwişk-Biratî û Demokrasiyê" ku di çarçoveya Pêvajoya Aştî û Civaka Demokratîk de li meclisê hat avakirin, bi guhdarîkirina gelek aliyên peywendîdar xebata xwe didomîne. Vetha Aydin, endama Lijneya Rêveber a Navendî ya Komeleya Mafên Mirovan (ÎHD), di civîna pêncemîn a 20'ê Tebaxê de ji aliyê komîsyonê ve hat guhdarîkirin. 

	 

	Vetha Aydinê got: "Me diyar kir ku ger komîsyon xebatê bike, divê bi birêz Abdullah Ocalan re jî bicive."

	 

	Vetha Aydinê destnîşan kir ku divê komîsyon li ser bingeha çareserkirina pirsgirêkê pêşniyazan pêşkêşî meclisê bike û got ku divê pirsgirêkên wekî windakirinên bi darê zorê, kuştinên nediyar, gundên valakirî, gorên komî, tundiya li dijî jinan û tecawiz werin çareserkirin. Vetha Aydinê, got: "Me tekez kir ku divê komîsyonên wekî edalet an hevrûbûnê werin avakirin û xebata wan li gorî wê berdewam bike. Ger em dixwazin pirsgirêkê çareser bikin, divê em bi rabirdûyê rehevrû bibin û di vî warî de, divê em bi mexdûran re hevdîtinê bikin. Divê ev pêvajo tenê ji hêla partiyên di meclisêde neyê meşandin. Kes û saziyên ku ji pirsgirêka Kurd êş kişandine û ji bo çareserkirina vê pirsgirêkê dixebitin, divê di van binkomisyonan de cih bigirin. Wekî din, divê binkomisyon bi partiyên siyasî ve sînordar nebin."

	 

	TESPÎTKIRINA GORÊN KOMÎ

	 

	Vetha Aydinê diyar kir ku ew ji bo girtiyên li girtîgehan, bi taybetî ji bo Rêberê Gelê Kurd Abdullah Ocalan "mafê hêviyê" dixwazin û ev tişt anî ziman: "Me nîşan da ku ev pirsgirêk ne tenê pirsgirêkeke 40 salî ye, pirsgirêkeke 100 salî ye û em çawa dikarin beşdarî çareseriya vê pirsgirêkê bibin. Mînak, gorên kesên wekî Şêx Seîd, Seyîd Riza, Seîdê Nûrsî hîn ne diyar in. Destûr nayê dayîn ku cenazeyên hem sivîlan û hem jî çekdarên ku di operasyonên sînor de jiyana xwe ji dest dane bînin Tirkiyeyê. Me diyar kir ku divê ev destûr were dayîn da ku malbatên li vir pêvajoya şînê derbas bikin an jî di civaka Kurd de atmosfereke erênî biafirînin. Me daxwaz kir ku gorên komî tavilê werin destnîşankirin û ev gor werin vekirin. Goristanên çekdarên ku di pêvajoya berê de jiyana xwe ji dest dane piştî ku pêvajo hat sabotekirin hatin hilweşandin. Rastiya Newala Qesaba heye. Li wir bêhejmar cenaze hatin dîtin, lê li ser wê bêhejmar xanî hatin çêkirin. Sedema van hemû daxwazan ew e ku rabirdû neyê jibîrkirin."

	 

	Vetha Aydinê behsa Dayikên Şemiyê kir ku bi salan e dev ji lêgerîna edaletê bernedane û got ku divê Qada Galatasarayê ku ew jê re dibêjin "navenda bîranînê", ji bo Dayikên Şemiyê were vekirin. Vetha Aydinê destnîşan kir ku divê komîsyon ji bo gelek tiştan sererastkirinên qanûnî bike. 

	 

	MA / Ûgûrcan Boztaş