Li gorî agahiyên çavkaniyên xwecihî nasnameya 11 jinên Kurd ku di çalakiyên li Îranê û Rojhilatê de pêşengtî kirine û hatine binçavkirin, eşkere bû. Hat diyarkirin ku Melîka Kawendî (38) û xwişka we Sara Kawendî (47) di dema serdegirtina mala Melîka Kawendî de ji aliyê hêzên Îtlaetê ve hatin binçavkirin û şandin girtîgeha Kiçowî Kerec. Melîka Kawendî yek ji wan kesên ku di dema serhildana "Jin, jiyan, azadî" de bû.

 

Li gor heman agahiyan heft jinên din ên xelkê Îlamê ne, navên wan wiha ne; Ayda Aramş, Zeyneb Tehmasb, Hacer Xalidî, Dunya Sadiqî, Fatma Perîweşî, Suha Mesûdî û Sedef Qasimî ne. Ev heft jin di dema xwepêşandanên girseyî yên li Îlamê hatin lidarxistin de ji aliyê hêzên rejîma Îranê ve hatine binçavkirin. Heta niha jî di girtîgeha Îlamê de tên ragirtin. Hat gotin ku Ayda Aramş bi awayek birîndar hatiye binçavkirin.

 

Ji jinên din ên hatine binçavkirin Îlya Mehmudî (16) xelkê Kirmaşanê ye, lê li bajarê Kerecê dima. Di dema xwepêşandanan de hatiye binçavkirin û ew birine cihekî nediyar. Heta niha jî çarenûsa wê ne diyar e.

 

Jina bi navê Tahîre Suleymanî çalakvanek jîngehê ye û yek ji wan kesên ku di dema serhildana "Jin, Jiyan, Azadî" de hatiye girtine û ji Kirmaşanê ye. Ji bo bicihanîna cezayê sê meh û 10 rojan hatiye binçavkirin û şandine girtîgeha Kirmaşanê. Beriya niha ji aliyê dadgeha Îranê ve bi tometa ‘propaganda dijî dewletê’ ceza lê hatibû birîn.