Felem Aker, di 14’ê Tebaxa 2020’an de li navçeya Şemzînan a Colemêrgê bi îdiaya "endamtiya rêxistinê" hatibû binçavkirin û girtin. Felem Aker piştî 6 mehan hat berdan, lê piştî du salan, cezayê wê yê 6 sal û 3 meh hat erêkirin, carekî din hat girtin û şandin Girtîgeha Tîpa T a Wanê. Felem Aker di Kanûna 2024'an de li Nexweşxaneya Zanîngeha Yuzuncu Yil a Wanê emeliyata kîsikê zirav bû, lê piştî 12 rojan berî ku tedawiya wê bi dawî bibe, dîsa birin girtîgehê.

 

Felem Aker di girtîgehê de bi dehan caran krîza astimê derbas kir. Tevî ku piştî fîlmên radyolojî û patolojiyê doktor gotibû ev nodul bi xeter in û tedawî pêwîst e, tu gav nehatin avêtin. Hat zanîn ku ji ber kêmbûna oksîjenê, dil, mejî û organên wê yên jiyanî zede bandor bûne. Tevî ku ev rewşekî krîtîk e û mudaxeleya lezgîn pêwîst e, wezîfedarên tenduristiyê yên girtîgehê ev rewşa giran bi gotina 'derûnî ye" paşguh kirine.

 

'JI BER XEBATÊN JI BO GEL DI GIRTÎGEHÊ DE YE'

 

Hevjînê wê Eşref Aker bi bîr xist ku Felem Aker di sala 2021'an de hatiye girtin û wiha got: "Felem di nav xebatên partiyê de bû, encumenî kir, herwiha hevserokatiya HDP’ê ya navçeyê jî kir. Niha ev 4 sal in di girtîgehê de ye. Tevî ewqas nexweşiyan di zindanê de tê ragirtin. Mîna wê gelek girtiyên nexweş jî hene. Ev bêwijdanî ye. Hiqûq, edalet û bawerî tune ye, heke hebûya nexweşek mîna wê saniyeyekê jî li wir nededihiştin. Tu qanûn, exlaq û ol vê rewşê qebûl nake. Felem tenê ji ber ku ji bo gelê xwe xebitî di girtîgehê de ye."

 

'NEXWEŞIYA HEVJÎNA MIN GIRANTIR DIBE'

 

Aker bal kişand ser giranbûna nexweşiyên Felemê û wiha axaftina xwe bi dawî kir: "Niha her roj divê oksîjenê bistîne. Astima wê heye û rêjeya oksîjenê di laşê wê de carinan heta 45’an dadikeve. Beriya du mehan emeliyata guatirê bû. Piştre şandin Saziya Tiba Edlî (ATK). Dîsa qirika wê werimiye û divê emeliyat bibe. Lê tevî vê yekê jî ATK’ê rapora 'dikare di girtîgehê de bimîne' daye. Ji ber ku edalet tune ye. Navê vê zilm e. Girtîgeh bi girtiyên nexweş dagirtî ne. Nexweş bi tedawiya rojane baş nabin. Bila girtiyên nexweş berdin, em wek malbat li wan binerin. Heke piçek edalet, hiqûq û wîjdan hebe, divê hemû girtiyên nexweş tavilê werin berdan."