RIHA - Rêveberê OHD'ê Mehmet Alî Aslan diyar kir ku girtiyên li Girtîgeha Tîpa T ya Siwerekê di hucreyên yekkesî de tên girtin, di dema veguhestina nexweşxaneyê de lêgerîna li hundirê dev li wan tê ferzkirin, hevdîtinên malbatê pêk nayên û serbestberdan bi awayekî keyfî tên astengkirin.

 

Rêveberê Komeleya Hiqûqnasên Ji Bo Azadiyê (OHD) Mehmet Alî Aslan ku li Girtîgeha Tîpa T ya Sêwregê bi girtiyan re hevdîtin pêk anî, diyar kir ku girtî di hucreyên yekkesî de tên girtin, di dema veguhestina nexweşxaneyê de rastî lêgerîna li hundirê dev tên, cezayên dîsîplînê yên keyfî tên dayîn, hevdîtinên malbatê tên qedexekirin û serbestberdana wan bi keyfî tê astengkirin. Aslan ku got ku wî hevdîtin bi girtiyan re li ser daxwazên girtiyan û malbatên wan pêk aniye, diyar kir ku li girtîgehê 11 girtiyên siyasî hene. Aslan Anî ziman ku 10 ji wan di hucreyan de ne, lê girtiyê bi navê Ahmet Ozturk di hucreya yekkesî de ye. Aslan got: "Girtiyê bi navê Ahmet Ozturk ku di hucreyeke yekkesî de ye, cezayê muebetê yê giran lê hatiye birîn. Rojê tenê saetekê destûr tê dayîn ku derkeve hewadariyê. Ji ber ku ew tenê kesê ku cezayê muebetê yê giran lê hatiye birîn e, têkiliya wî bi kesekî din ê di girtîgehê de tune ye. Ji ber ku malbata Ahmet Ozturk li Mêrdînê dijî, hevdîtinên birêkûpêk ên malbatê jî ne mimkun in."

 

Aslan diyar kir ku dêya Ahmet Ozturk nexweşa penceşêrê ye û daxwazên wî yên ji bo serdanan ji aliyê rêveberiyê ve hatine redkirin û got: "Wî destûr xwest ku dêya xwe bibîne. Wî ji rêveberiyê destûr xwest, lê wan red kir, bi hinceta Qanûna Înfazê. Ahmet Ozturk çend caran daxwaza veguhestina wî bo girtîgeheke nêzîk kiriye da ku malbata wî bi hêsanî karibe serdana wî bike. Lê belê, tu bersivek ji vê daxwazê ??re nehatiye dayîn. Rêveberiya girtîgehê hewce dike ku Ahmet Ozturk ku di tecrîdê de dijî, bişîne. Em daxwaz dikin ku rayedarên pêwendîdar ji bo bidawîkirina îşkenceya li ser Ahmet Ozturk înîsiyatîf bigirin û wî veguhezînin girtîgehekê ku qet nebe nêzîkî malbata xwe be." 

 

HEVDÎTINA MALBATÊ TÊ ASTENGKIRIN

 

Aslan diyar kir ku girtiyên din jî ragihandine ku bi gelek binpêkirinên mafên mirovan re rû bi rû ne û got: "Tacettin Kalgi ku me li girtîgehê pê re hevdîtin kir, got ku ew nikare hevdîtinê bi malbatê re bike. Wî got ku ji ber ku mahra wî ya fermî bi hevjîna wî re tune ye, destûr nayê dayîn ku hevjîna wî û zarokê wî serdana wî bikin. Wî got ku dema ku wî navê wan wekî serdêr tomar kiriye, destûra hevdîtinê hatiye redkirin, bi hinceta 'têkilî bi rêxistinê re heye.'" 

 

Aslan bilêv kir ku di hevdîtinê de girtiyan ragihandiye ku girtiyên siyasî nikarin bigihên xizmeta tenduristiyê û mafê wan ê dermankirinê tê astengkirin. 

 

Aslan da zanîn ku daxwaznameyên girtiyan jî ji aliyê îdareyê ve esas nayên girtin û bi tu awayî ne erênî ne jî neyînî nayên bersivandin. 

 

Aslan di dawiyê de diyar kir ku li girtîgehê berdana Ahmet Tumer ê 30 sal in girtiye cara çaran ji aliyê Lijneya Îdare û Çavdêriyê ya girtîgehê ve hatiye taloqkirin. 

 

MA / Omer Akin