Li bakur û rojhilatê Sûriyeyê, tevî îlankirina agirbestê ya Şamê, êrişên ji aliyê Heyet Tehrîr el-Şam (HTŞ) û komên paramîlîter ên ku ji aliyê Tirkiyeyê ve tên pıştgırikırın, dijwartir dibin. Her çend tê ragihandin ku hin ji van koman unsûrên têkildarî DAIŞ'ê dihewînin jî, dîmenên komkujiyan û îşkenceyan yên ji herêmê tên pir êşbar in. Li gelek bajarên li seranserê Kurdistan û Tirkiyeyê, raya giştî bi ruhê seferberiyê berteka xwe ya li hember van êrişan nîşan dide. Alimên olî yên li navçeya Cîzîrê jî bal kişandin ser aliyê olî yê rewşê.

 

‘TU ELEQEYA VÊ ZÎHNIYETÊ BI ÎSLAMÊ RE TUNE'

 

Mele Kasim Yîgît diyar kir ku sembolên Îslamî yên ku ji hêla komên êrişkar ve tên bikaranîn rastiyê nîşan nadin û ev wehşet rûmeta mirovan binpê dike. Yîgît got: "Em bi zîhniyetek ku li dijî exlaqê mirovan û Îslama rastîn e re rû bi rû ne. Yên ku êrişî Rojavayê dikin tu eleqeya wan bi Îslamê re tune. Îşkenceya ku di rojên dawî de li cenazeyan tê kirin, dîmenên dilê şervanekî ku tê derxistin, êrişên li dijî hemû mirovahiyê ne. Yên ku vê dikin ne tenê dijminê Îslamê ne, dijminê hemû mirovahiyê ne. Dayikên me 50 sal in ji bo aştiyê diqîrin, zarokên xwe ji bo aştiya ku were disipêrin axê. Îro, Kurd ne tenê ji bo xwe, di heman demê de ji bo ku Kurd, Tirk, Ereb û Faris bi hev re bi rûmet bijîn jî têdikoşin."

 

‘ÊN JI BO FILISTÎNÊ BERTEK NÎŞAN DIDIN ÇIMA ROJAVAYÊ NABÎNIN?'

 

Yîgît ku bêdengiya cîhana Îslamê wekî "dustandardiyê" bi nav kir, ji kesên ku di ser Filistînê re siyasetê dikin re wiha got: "Bi dehan dewletên Misilman hene, lê ew li hember êrişên li dijî Misilmanan bêdeng in. Çima ew kesên ku bertek nîşanî êrişên li ser Filistînê didin îro Rojava, Kobanê û Helebê nabînin? Ma qirkirina wan zarokan wijdanê we naêşîne? Ma ev Îslam e? Çima ew kesên ku xwe wekî dewletên Îslamê bi nav dikin li hember vê hovîtiyê bêdeng in? Dema ku ciwanên Kurd duh ji bo Filistînê canê xwe dan, çima îro gelê Kurd bi tenê tê hiştin? Bila neyê jibîrkirin ku ew kesên ku li hember neheqiyê bêdeng dimînin, bi gotina Pêxemberê me, şeytanên bêdeng in. Di vê zivistana dijwar de bi qîrîna 'Allahû Ekber' serê zarokan jêkirin berî her tiştî heqareteke mezin li Îslamê ye. Yên ku vê heqaretê qebûl dikin divê baweriya xwe bidin ber lêpirsînê." 

 

‘DIXWAZIN PROJEYA ROJAVAYÊ BIFETISÎNIN'  

 

Yîgît bal kişand ser kûrahiya olî û civakî ya modela rêveberiyê ya li Rojavayê hatiye avakirin û got ku tepeserkirina vê modelê tê hedefgirtin. Yîgît got: "Rêveberiya Xweser ne tenê ji Kurd an Misilmanan pêk tê; ew hemû gel û baweriyan dihewîne. Projeya Rojava mîna Peymana Medîneyê ye. Ew êrişî wê dikin da ku wê bitepisînin. Dengê xwe li dijî vê yekê bilind bikin. Ev proje ji bo hemû mirovahiyê hêviyek e. Rizgariya her kesî di vê projeyê de ye. Divê alimên olî ji minberên xwe li dijî vê komkujiyê derkevin û dengê xwe yê aştiyê li dijî vê komkujiyê bilind bikin. Divê her kesê ku li Tirkiyeyê dijî ji bo aştiyê tevbigere û nebe hevkarê vê zilmê."

 

‘BILA KES LI SER NAVÊ DÎN ÊRIŞÎ KURDAN NEKE'  

 

Mele Saît Ozdemîr bi îqtibaskirina ayeta 13'an a Sûreya Hucûratê bersiv da hewldanên rewakirina komkujiyên di bin maskeya Îslamê de: "Xwedê di vê ayetê de bi awayekî zelal dibêje ku wî mirov bi ziman û neteweyên cuda afirandine. Ji ber vê yekê çima hebûn, ziman û nasnameya Kurdan tê înkarkirin? Êrişkirina li ser Kurdan li dijî vê ayetê û îradeya Xwedê ye. Ez van kiryaran li ser navê Îslamê şermezar dikim. Kuştina mirovan bi qîrîna 'Allahu Ekber' û îşkencekirina cenazeyan ne ol e; ew bi tevahî kufr û zilm e. Divê hemû alimên Îslamê yên li cîhanê vê rastiyê bibînin. Kurd tenê mafên ku ji makzayî yê her kesî ne dixwazin, ew şer û pevçûnê naxwazin. Divê kes olê wekî amûrekê bi kar neyne da ku êrişî gelê Kurd bike."

 

‘ÊN BI QASÎ SERÊ DERZIYÊ JÎ ÎMAN DI DILÊ WAN DE HEYE DIVÊ BÊDENG NEMÎNIN'  

 

Ozdemîr ku piştgirî da bangên seferberiyê, diyar kir ku êriş nirxên bingehîn ên Îslamê hedef digirin û got: "Divê her kesê ku ji xwe re dibêje Misilman bertekeke herî tund nîşanî van êrişan bide. Her kesê ku di dilê wan de bi qasî zerê derziyê jî îman di dilê wan de hebe, divê çi ji destê wan bikin; divê bi deng, pênûs û helwesta xwe li dijî vê zilmê rawestin. Dema ku birayên me li kêleka me tên kuştin, bêdengî nayê qebûlkirin. Nûnerên rastîn ên Îslamê Kurd in ku li kêleka bindestan radiwestin. Yên ku vê hovîtiyê dikin, tu eleqeya wan bi Îslamê re tune ye."

 

MA / Emrûllah Acar