Pîrozbahiya Newrozê ya li Qada Newrozê ya li Taxa Pazaryerî bi tevlîbûna deh hezaran kesan li Êlihê hat lidarxistin bi axaftinan berdewam kir.

 

Aktîvîsta Tevgera Jinên Azad (TJA) Mekiye Ormanci axivî û bi taybetî Newroz li jinan pîroz kir. Mekiye Ormanci peyama Abdullah Ocalan a ji bo jinan bi bîr xist û wiha got: "Îro yê ku vê manîfestoyê zindî bihêle jin in. Ev bang ji bo me jiyaneke nû pîroz dike. Ji bo ku ev mizgînî pêk were em ê her cihî veguherînin qada Newrozê û em ê li ber xwe bidin. Em ê li dijî kesên hewl didin jiyana me asteng bikin têkoşîna xwe xurt bikin. Bi vê wesîleyê dibêjim ku dem dema azadiya Rêberê Gelê Kurd e. Dem dema azadiya jin û gelan e. Newroz pîroz be. Jin, jiyan azadî."

 

'TÊKOŞÎN MÎNA KULÎLKÊN BIHARÊ MEZIN DIBE' 

 

Di dawiyê de Hevseroka Partiya Herêmên Demokratîk (DBP) Keskîn Bayindir di pîrozbahiyê de axivî û diyar kir ku ew di Newroza 2025 'an de bûne şahidên kêliyên dîrokî û wiha got: "Va ye meydan, va ye berxwedan. Em derbasî serdemeke nû dibin. Ev serdem serdema çareseriyê ye. Ji bo vê jî hemû gelên cîhanê piştgirî dane. Em îro dibînin ku bi sed hezaran mirovên li van meydanan destekê didin vê bangê." 

Bayindir da zanîn ku gelê Kurd bi dehan salan e li ber xwe dide û tevî komkujî û zextan jî ji daxwaza xwe ya azadiyê tawîz nedaye û wiha axivî: "Ev daxwaz mafên me ne. Lewma ev şer mîna kulîlkên biharê mezin dibe. Gelê Kurd têkoşîna xwe di biharê de mezin dike û li cîhanê belav dike. Êdî Kurdê ku ji nasnameya xwe, navê xwe û ji welatê xwe şerm bike tune ye. Her kes serê xwe bilind dike û dibêje, 'Ez Kurd im , ez ji Kurdistanê me , zimanê min Kurdî ye ' Dibêje 'Ez ê têkoşîna xwe bimeşînim' heta dawiyê."

 

NERAZÎBÛNA LI HEMBERÎ KOMKUJIYA KOBANÊ 

 

Bayindir qala bûyerên ku li Sûriyeyê diqewimin kir û wiha got: "Li wê derê jiyaneke bi rûmet heye. Bi pêşengiya jinên azad Rovayê Kurdistanê heye. Newroz pîroz be. Dîktatorek anîn ser rêveberiya Şamê. Li Sûriyê bi wî re siberoj nabe. Modeleke Rojava heye, divê bi cih were anîn. Ev model modela aştî, biratî û jiyana hevpar e. Dewleta Tirk li wir şaşitiyê dike. Dibêjin, 'Bila yek ziman, yek bawerî hebe' û şaş dikin. Divê AKP û Tirkiye ji Sûriyeyê vekişe. Divê destên xwe yên qirêj ji ser Rojava rakin, li wir azadî heye. Di bin vê zilm û zordariyê de dayikên me aştiyê dixwazin. Li Berxbotan 7 zarok qetil kirin. Hûn nikarin xwişk û birayên me yên bi me re ne bikujin. Dev ji vê polîtîkayê berdin. Vê siyasetê ti carî bi ser nexist. Nikarin bi ser bikevin, dest ji vê durûtiyê berdin."

 

'EV DER BAJARÊ EGÎDAN E' 

 

Bayindir, anî ziman ku ew ji gelê kurd û Rêberê Gelê Kurd Abdullah Ocalan bawer dikin û wiha berdewam kir: "Li aliyekê hûn ê bêjin biratî, li aliyê din jî hûn ê Stenbolê serûbin bikin. Ji sala 2016 'an û vir ve 3 caran li vîna gelê Êlihê xesp kirin. Divê qeyûm bizanibin ku nikarin şaredariyê bikin, hûn nikarin bibin serokê polekê jî. Eger tu Beyê Bolûyê bî, ev bajar bajarê Egîdan e. Zîhniyeteke dijminane heye. Karê wan ê pêşî qedexekirina zimanê Kurdî ye. 101 xebatkarên şaredariyê ji kar derxistin.

 

Sibe wê Newroz li Amedê bê pîrozkirin. Em di wê baweriyê de ne ku em ê peyama Birêz Ocalan di Newrozê de bide guhdar bikin. Sibe em ê bang li her kesî bikin ku dakevin qadan. Sibê ku Newroz dê ji milyonan re deriyê aştiyê veke. Gelê Êlihê, tu ji vê re amade yî? Berpirsyarî dikeve ser milê me hemûyan. Ji ber ku gelê Kurd ketiye pêvajoya azadiyê û xwedî hêviyek mezin e, ti hêz û hêz nikare pêşiya vê bigire. Ev rê rêya edalet, aştî û rûmetê ye. Newroza gelê Kurdistanê û gelên bindest pîroz be. Bila bibe saleke azadî, serkeftin, aştî. Bila ev Newroz bibe wesîleya azadiya Rêberê Gelê Kurd Birêz Abdullah Ocalan."

 

Piştî axaftinan Newroz bi derketina ser dike ya Koma Aryen berdewam kir.