STENBOL - Jin, bi ruhê serhildanê yê 8’ê Adarê dadikevin qadên Newrozê. Endama Komeleya Dema Jinê ye Newroz Unverdî, got: “Her du roj jî ji bo jinan girîng in. Em ê di Newrozê de daxwaza xwe ya ji bo civaka demokratîk, azadî û aştiyê bînin ziman.”
Jinên ku nerazîbûna xwe ya li dijî tundiya mêr-dewletê, tacîz, destdirêjî û polîtîkayên şer di 8’ê Adarê Roja Jinan a Cîhanê de nîşan dan, vê têkoşîna xwe niha jî vediguhêzin qadên Newrozê. Endama Komeleya Dema Jinan e Newroz Unverdî têkildarî pîrozbahiyên Newrozê ku îsal bi dirûşma “Rêbertiya Azad Civaka Demokratîk” tên lidarxistin û têkoşîna hevpar axivî.
Newroz Unverdî, diyar kir ku jinên Kurd, feminîst û Tirkiyeyî xwedî zemîneke têkoşîneke hevpar in û bi bîr xist ku jinên herî dawî di 22-23’yê sibatê de beşdarî “Komxebata jin li ser aştiyê diaxivin” bûn, “Înîsiyatîfa Pêdiviya Min Bi Aştiyê Heye” ava kirine. Newroz Unverdî, wiha got: “Ev înîsiyatîf di esasê xwe de ne ji pêdiviyeke niha destpêkirî derket. Beriya niha jî kampanyayên ji demê re bûne bersiv hatin meşandin. Têkoşîna aştiyê ya hevpar a di navbera tevgera feminîst û jinên Kurd de ji salên 90’î ve dest pê kir. Li dijî tundiya dewletê ya li Kurdistanê, feminîstên Tirkiyeyê li dijî neteweperestî, şer û kedxwariyê kampanyaya ‘Dest nede hevala/ê min’ dabû destpêkirin. Di 1996’an de kampanyaya ‘Jin ber bi hev ve dimeşin’ hat destpêkirin. Piştre jî Hewldana Jinan a Ji Bo Aştiyê hat avakirin. Ev, çendek mînakên têkoşîna hevpar in. Feminîstên Tirkiyeyî di sala 2009’an de li cihên şer çûn serdana aktîvîstên tevgera jinên Kurd. Peyamên piştevaniyê dan û çalakiyên hevpar plan kirin.”
JI 8’Ê ADARÊ BER BI NEWROZÊ VE
Newroz Unverdî, diyar kir ku tecrubeyên wan ên şer û şerê li Kurdistanê tê meşandin, ji bo aştiyê têkoşîneke hevpar bi xwe re aniye û axaftina xwe wiha qedand: “Ji sala 2016’an heta niha li dijî têkoşîna ji bo azadî û wekheviyê êrişên dijwar tên kirin. Vê jî eleqeya xwe bi guherandina şêweyê şer hebû. Hewceye em li ser aştiyê biaxivin, nîqaş bikin, birêxistin bikin û li her qada civakê belav bikin. Ji ber vê pêdiviyê jî ev înîsiyatîf hat avakirin. 8’ê Adarê ji bo jinan roja têkoşîna azadiyê ye. Newroz jî ji bo gelê Kurd roja bilindkirina têkoşîna azadiyê ye. Her du roj jî ji bo jinan û jinên Kurd girîng û krîtîk in. Ber bi Newrozê ve em dikarin vê bibêjin; em ê daxwaza xwe ya ji bo civaka demokratîk, azadî û wekheviyê bînin ziman. Weke jinan em ê bi kelecan û baweriya aştî û azadiyê dakevin qadên Newrozê.”
MA / Yeşîm Tukel