Nobeda ku Meclisa Ekolojiyê ya Gimgimê li dijî projeya Santrala Enerjiya Jeotermal (JES) ku ji aliyê Şîrketa IGNIS H2 ya Amerîkî ve tê xwestin li gundê Xwarik ê navçeya Gimgim a Mûşê bê çêkirin, berdewam dike. Di roja 74’emîn a nobeda konan de pankarta “Gelê Gimgimê santrala ceyranê ya jeotermal naxwaze.”, “Em xweza, bawerî û dahatûya xwe diparêzi” “Kok, gund û têkoşîna me li vir e. Em li vir in” hat daliqandin. 

Hevşaredarên Bajarê Mezin a Amedê Serra Bucak û Dogan Hatun û şandeya bi wan re serdana nobeda li dijî JES’ê ya li Gimgimê kirin.

 

Serra Bucakê destnîşan kir ku gelê herêmê bîra têkoşîna civakî ye û piştî şer Kurdistan bi awayekî sîstematîk bi qirkirina xwezayê re rû bi rû maye û wiha axivî: “Em qirkirinên vê pergalê yên ku dixwaze li ser vê erdnîgariyê bikin, dizanin. Ji Dêrsimê ta Gimgimê, ji Çewlîgê ta Kanîreşê roj bi roj qirkirin pêk tê. Kar û têkoşîna me dijwar e. Mixabin ev der cihê erdhejê ye. Ev JES jî xeternak in. Daraz jî wek baskek desthilatê ye. Guh nade raporên ÇED’ê. Em têkoşîna we silav dikin û bi we re ne.”

 

‘BIRYAR DÊ WEK ŞERMEK DI DÎROKÊ CIH BIGIRE’

 

Dogan Hatun bertek nîşanê rapora têkildarî “Pêwistî bi ÇED’ê nîn e” da û got: “Li vî welatî kes, li gel û aktivîstan guhdar nake û li ser erdnîgariya ku nedîtine biryar didin. Hûn li Enqereyê li odeyên wezaretê bêyî ku bedewiya vê erdnîgariyê bibînin û li gotinên gel guhdar bikin, biryar didin? Em bangî rayedarên darazê bikin; werin vê biryarê betal bikin. Werin li gel guhdar bikin. Li vir, ev biryar tenê li ser kaxiz dê werk şermek di dîrokê de cih bigire.”

 

Piştî axaftinan Serra Bucak û Dogan Hatun têkildarî pêvajoyê bi gel re suhbet kirin.

 

Çalakiya nobedê îro dê ji aliyê gundên Gestemerd û Kovikê dewr bê girtin.