Îranê, ji bo li Kendavê ewlehî û aramî ji nû ve çêbibe, peyamek da civaka navneteweyî. Nûnerê Daîmî yê Neteweyên Yekbûyî (NY) yê Îranê Emîr Seîd Îravanî, di axaftina xwe ya li Konseya Ewlehiyê ya NY'yê ya li New Yorkê de, diyar kir ku ji bo kêmkirina rageşiyê li herêmê, divê hemû êrişên li dijî Îranê bi awayekî mayinde bi dawî bibin. Îravanî got: "Ewlehî û aramiya mayînde li Kendavê û herêma berfireh tenê bi rawestandina mayinde û domdar a hemû êrişên li dijî Îranê, bi dabînkirina garantiyên pêbawer ku dê ev careke din dubare nebe û bi temamî rêzgirtina li mafên serweriyê yên rewa yên Îranê dê pêk bê." 

 

Di civînê de, gelek welatan rexne li Îranê girt ji ber kontrolkirina Tengava Hurmuzê û bal kişandin ser girîngiya vê xala transîtê ya stratejîk ji bo dabînkirina enerjiya cîhanî. 

 

'DYA KORSANTIYÊ DIKE'

 

Piştî civînê, Îravanî di axaftina xwe ya bi çapemeniyê re de parast ku rexne yekalî ne. Îravanî bi tundî polîtîkayên DYA'yê yên herêmê hedef girt û nebûna behskirina dorpêça deryayî ya ji hêla Washingtonê tê kirin rexne kir. Îravanî got: "DYA bi zorê keştîyên bazirganî hedef digire, muretebatan ditirsîne, keştîyan digire û personelan dîl digire. Ev korsantî û terorîzm bi xwe ye." 

 

Îravanî destnîşan kir ku civaka navneteweyî fikarên xwe yên li ser ewlehiya deryayî aniye ziman lê li ser kiryarên DYA'yê bêdeng maye û got: "Di civîna îro de, kesî newêribû van kiryaran bi dengekî bilind bibêje an jî şermezar bike."