Konferansa Ewlehiyê ya 62'emîn a Munîhê ku serokên ji welatên cuda yên cîhanê beşdar bûn, di roja duyemîn de berdewam kir. Fermandarê Giştî yê Hêzên Sûriya Demokratîk (HSD) Mazlûm Ebdî û Hevseroka Beşa Têkiliyên Derve ya Rêveberiya Xweser a Bakur û Rojhilatê Sûriyeyê Îlham Ehmed ku duh bi Wezîrê Karên Derve yê DYA'yê Marco Rubio û Serokkomarê Fransayê Emmanuel Macron re hevdîtin kirin, di roja duyemîn de têkiliyên xwe berdewam kirin.

 

Mazlûm Ebdî û Îlham Ehmed bi hev re hatin hola konferansê. Di roja duyemîn a konferansê de, Mazlûm Ebdî û Îlham Ehmed bi Komîserê Bilind ê Penaberan ê Neteweyên Yekbûyî (NY) Dr. Berhem Salih re civiyan.

 

Mazlûm Ebdî û Îlham Ehmed her wiha bi endamên Senatoya DYA'yê bi serokatiya Senator Jeanne Shaheen û Wezîrê Karên Derve yê hikûmeta demkî ya Sûriyeyê Esed Şeybanî re civiyan.

 

Li gorî nûçeya televîzyona Rûdawê, Serokê Konferansa Ewlehiyê ya Munîhê (MSC) WOlsgang Ischinger diyar kir ku beşdarbûna Mazlum Ebdî û Nêçîrvan Barzaniyê Serokê Herêma Kurdistana Iraqê di konferansê de pir girîng bûye. Ischinger got ku ew dixwazin Sûriye bibe welatekî aştîxwaz û wiha got: "Piştî gelek salan şer û guhertina rejîmê, ev beşdarbûn pir girîng e. Em hemû hêvî dikin ku Sûriye bibe welatekî aştîxwaz ku tê de Sûrî, Kurd û hemû pêkhateyên din karbiin bi hev re di aştiyê de bijîn. Wekî hikûmeta federal û hevkarên wê, em amade ne ku her tiştî bikin da ku tişt ber bi rêça rast ve biçin û piştgiriya darayî bidin. Ez dibînim ku Sûriye di dawiyê de dibe welatekî asayî û ez vê wekî pêşketineke dîrokî dibînim."