Alîkarê Hevserokên Giştî yên HDP’ê Umît Dede yê ji Hiqûq û Mafê Mirovan berpirsyar e têkildarî metirsiyên vîrûsa koronayê ku li girtîgehan belav bibe li navenda gitştî ya partiya xwe civîna çapemeniyê li dar xist. 

 

GRÛB YORÛM Û BINÇAVKIRINA PARÊZERAN 

 

Dede beriya qala metirsiyên vîrûsa koronayê bike bal kişand ser endamên Grûb Yorûm ên di rojiya mirinê de ne û binçavkirina parêzeran. Dede got mudaxelekirina bi darê zorê ya endamên Grûb Yorûm nayê qebûlkirin û xwest daxwazên werin qebûlkirin. Dede diyar kir ku binçavkirina parêzerên niha di Rihayê de di binçavan de ne û krîmînalîzekirina xebatên parêzeran nayê qebûlkirin û xwest parêzer demildest werin berdan. 

 

‘GIRTÎGEH QADEK BI XETERE YE’ 

 

Dede da zanîn ku vîrûsa koronayê li çar dinyayê belav bûye û got: “Ew metirsiyên me hene ku girtîgehên hatine tijekirin di bin gefa vîrûsê de ne. Girtîgeh di grûba xetereyê de ye.”

 

Dede bal kişand ser daxuyaniya Wezareta Dadê ya ji bo girtîgehan da û got: “Jixwe azadiya wan hatiye sînorkirin. Di vê daxuyaniyê de ji bilî astengkirina hevdîtina li gel malbatan a ji bo du hefteyan behsa tu tedbîran nehatiye kirin.” 

 

‘GIRTIYÊN NEXWEŞ, EXTIYAR, DAYIKÊN GIRTÎ Û ZAROKAN BERDIN’ 

 

Dede tedbîrên divê li girtîgehan werin girtin rêz kir û got: Divê girtiyên nexweş û extiyar werin berdan. Cezayê hikumxwarên nexweş û extiyar were taloqkirin. Pêwîste pêşiya tahliyeyan were vekirin. Pêwîste standartên navnetewî werin pêk anîn. Lazime xwarina girtiyan were kontrolkirin û hîjyen bê girtin. Dayikên bi zarokên xwe re girtî û zarokên girtî û girtiyên nexweş divê gavek beriya gavekê werin berdan. Pêwîste Wezareta Dadê ji bo metirsiyên malbatên girtiyên niha hejmara wan gihîştiye 400 hezarî ji holê rake agahiyan bide.” 

 

BANGA LEZGÎN 

 

Dede ji bo metirsiyên vîrûsa koronayê banga lezgîn li Wezareta Dadê kir û got: “Pêwîste Wezareta Dadê bi lez û bez bikeve nava tevgerê. Nexwê heke tiştek biçûk bibe dê rayedarên hikumetê berpirsiyar werin girtin.”