Temellî ji YSK'ê got li gorî îçtîhata xwe tevbigere                           

2019-04-10 14:51:34


	 

	ENQERE - Hevserokê Giştî yê HDP'ê Sezaî Temellî, derbarê bêhiqûqiya di pêvajoya hilbijartina herêmî ya 31'ê Adarê hatkirin û helwesta YSK'ê ya piştî hilbijartinê de axivî û got: "Tirkiye bi krîzek pir cidîre rû bi rû ye. YSK divê li gorî îçtîhata xwe tevgere."

	 

	Hevserokê Giştî yê Partiya Demokratîk a Gelan (HDP) Sezaî Temellî, Hevberdevka Komîsyona Mafê Mirovan û Parlementera Êlihê Ayşe Acar Başaran û Berdevkê Komîsyona Karê Hilbijbartinê Alî Urkut, derbarê bêhiqûqiya di pêvajoya hilbijartina herêmî ya 31'ê Adarê hat kirin û helwesta YSK'ê ya piştî hilbijartinê de, li avahiya Navenda Giştî ya partiyê civîna çapemeniyê li dar xistin.  

	 

	'ENCAMAEK NEYÎNÎ DERKETIYE HOLÊ'

	 

	Hevserokê Giştî Sezaî Temellî di civînê de axivî û wiha got: "Di dema kampanya hilblijartinê de guhertina cihê hilbijêran, jêbirina qeyda hilbijêran, bicihkirina leşkeran bi taybetî li hin deveran, dengdana leşkeran, rola qeymeqam û waliyan a di vê pêvajoyê de di nav de gelek bêûsilî hatin eşkerekirin. Em hişyarî dan ku ev yek wê bandorê li encamên hilbijartinê bike, lê belê hişyariyên me ji nedîtî ve hatin û encamek neyînî derketiye holê. Tirkiye bi krîzek pir cidîre rû bi rû ye. YSK divê li gorî îçtîhata xwe tevgere."

	 

	Temellî got, meseleya Şirnexê, meseleyên Mûş û Milazgirê bi vî rengî ne û destnîşa kir, dema ku ev rewş bi giştî were nirxandin wê bê dîtin ku bêedaletî û bêbaweriya bi hilbijartinê rû daye.

	 

	Temellî bi bîr xist, tevî ku 10 roj di ser hilbijartinê re derbas bûne hîn jî encamên hilbijartinê tên nîqaşkirin û işaret bi rola neyînî ya Desteya Hilbijartinê ya Bilind (YSK) a di vê mijarê de kir. Temellî got, ya heyî krîzeke cidî ye. Temellî bang li YSK'ê kir ku bi lezgînî li gorî qanûnan tevbigere, biryarên ku bersivê didin bendewariyên civakê û wijdanan rehet dike, bide. Temellî got, 90 ji sedî yên îtirazên AKP'ê tên qebûlkirin, lê îtirazeke tenê ya HDP'ê jî nehatiye qebûlkirin.

	 

	'HEVALÊN ME HATINE HILBIJARTIN, LÊ MAZBATAYAN NADIN WAN'

	 

	Temellî bal kişand ser bêhiqûqiya piştî hilbijartinê li wan tê kirin û got, "Hevalên me hatine hilbijartin lê mazbatayan nadin wan. 3 bajarên me yên mezin, tevî ku namzetên me yên ji bo hevşaredariyên Wan, Amed û Mêrdînê hatine hilbijartin û ev serketin bi rêjeyeke bilind a dengan hatiye bidestxistin jî mazbatayan nadin hevalên me. Sedema vê yekê jî nayê eşkerekirin. YSK'ê jî hîn daxuyaniyek nedaye ku çima ev mazbata nayên dayin."

	 

	'EM Ê RÊ NEDIN LÎSTIKAN'

	 

	Temellî destnîşan kir, ev krîz ji ber hesabên şaş ên li hin deveran e û got, "Em ê rê nedin wan hesabên şaş. Me got ku em ê vê lîstikê têk bibin, me di hilbijartinê de têk bir, me li ser sindoqan têk bir."

	 

	Temellî da xuyakirin, YSK divê li gorî destûra bingehîn û qanûnan tevbigere û got, "Nedana mazbatayan nedîtina îradeya dengdêran e. Li gorî Destûra Bingehîn tevbigerin û mazbatayên namzetên hatine hilbijartin bidin wan. Wezîfeya dadgehên bilind e ku demokrasiyê, mafên mirovan biparêzin. Em hişyar dikin ku dest ji avêtina gavên li dijî vê yekê berdin."

	 

	Temellî herî dawî dest nîşan kir ku ji kiryarên heyî xuya dibe ku Rewşa Awarte hîn neqediya ye.