
Jin li dijî komployê meşiyan: Armanca komployê tunekirina destkeftiyên gelê kurd e 

2022-10-05 17:12:05


	&nbsp;

	ÊLIH - Jinan, l Komploya Navneteweyî ya 9’ê Cotmehê ya li dijî Rêberê PKK’ê Abdullah Ocalan li Êlihê bi meşekê şermezar kirin û wiha gotin: “Yên ku têkoşîna jinan a bi felsefeya Ocalan hatiye afirandin hedef digirin, nekarîn bi me paşvegav bidin avêtin. Armanca komployê, tunekirina destkeftiyên gelê kurd bû.”&nbsp;

	&nbsp;

	Komploya Navneteweyî ya 9’ê Cotmehê ya li dijî Rêberê PKK’ê Abdullah Ocalan ku bi derxistina Ocalan a ji Sûriyeyê dest pê kiribû, li Êlihê bi pêşengtiya Tevgera Jinên Azad (TJA) bi meşekê hat şermezarkirin. Parlamentera Partiya Demokratîk a Gelan (HDP) a Êlihê Feleknas Uca, endamên Meclisa Dayikên Aştiyê, endam û rêveberên HDP’ê yên bajar û gelek kes tev li meşê bûn. Di çalakiyê de wêneyên Endama Navenda Lêkolînên Jineolojiyê û Edîtora Kovara Jineolojiyê Nagihan Akarsel ku di encama êrişeke çekdarî de hatibû qetilkirin û dovîza “Dawî li tecrîda li Îmraliyê bînin” hatibûn vekirin.

	&nbsp;

	Jinên ku li ser Cehdeya Koçeran hatin ba hev, bi pankart û wêneyên Akarsel heta Parka Zozanê meşiyan. Di dema meşê de gelek caran dirûşma “Jin, jiyan, azadî” berz kirin û piştre jî li parkê daxuyanî hat dayîn. Di daxuyaniyê de parlamenter Feleknas Uca komploya navneteweyî ya li dijî Abdullah Ocalan şermezar kir û wiha got: “Ev komplo hêj berdewam e. Tecrîda li ser Ocalan, li her qada jiyanê xwe nîşan dide. Armanca komployê, tunekirina destkeftiyên gelê kurd e.”&nbsp;

	&nbsp;

	DIRÛŞMA ‘JIN, JIYAN AZADÎ’

	&nbsp;

	Di berdewamê de Uca anî ziman ku komplo, bi zêdebûna tundiya li ser civakê re bandora xwe nîşan dide û wiha derbirî: “Hevala Nagihan li Silêmaniyeyê, Jîna Amînî jî li Îranê hat qetilkirin. Li dijî kesên bi komkujiyan têkoşîna jinan hedef digirin, dirûşma ‘jin, jiyan, azadî’ li tevahiya cîhanê deng veda. Û jin li dora vê dirûşmê civiyan û berxwedaneke mezin raber dikin. Ev dirûşm, sembola tevgera jinên kurd e. Kesê ev dirûşm afirandî, niha di bin tecrîdê de ye. Em ê destûrê nedin vê. Em ê tu carî li dijî komplo û qirkirinên jinên paşdegav neavêjin. Sedema krîza aborî û siyasî ya li Tirkiyeyê, tecrîda li Îmraliyê ye. Yên ku têkoşîna jinan a bi felsefeya Ocalan hatiye afirandin hedef digirin bila baş bizanin ku ne qetilkirina Sevêyan û ne jî ya Sakîneyan bi me paşdegav nedan avêtin. Êrişa li dijî hevala me ya Nagihanê, sedema berxwedana me ye. Heta ku em hem tecrîdê û hem jî êrişên li dijî têkoşîna jinan berteraf dikin dê têkoşîna me bidome.”&nbsp;

	&nbsp;

	Daxuyanî bi çepik û dirûşma “Jin, jiyan, azadî” bi dawî bû.&nbsp;

	&nbsp;