
Bi hinceta ‘silav û hembêzkirinê’ ceza dan siyasetmedarên jin ên li Sîncanê 

2022-07-30 13:37:35


	ENQERE - Bi sedema ku silav dane xizmên hev û ew hembêz kirine, cezayê disiplînê li siyasetmedar Ayla Akat Ata û Ayşe Yagci hate birîn. Ata û Yagci têkildarî cezayê hatiye dayîn parastin kirin û gotin: “Tiştekî mirovî ye.”&nbsp;

	&nbsp;

	Derheqê siyasetmedarên jin Ayla Akat Ata û Ayşe Yagci ku li Girtîgeha Jinan a Sîncanê tên ragirtin, lêpirsîna disiplînê hat destpêkirin. Cezayê “mehekê nikarin tev li hinek çalakiyan bibin” li siyasetmedarên jin hate birîn. Ji bo cezayê hatiye birîn jî ev sedem hat nîşandan: “Di hevdîtina 6’ê tîrmehê de tevî hişyariyan jî xizmên hev hembêz kirine, bi destên wan girtine û bi wan re sihbet kirine.”&nbsp;

	&nbsp;

	Ata û Yagci di 21’ê tîrmehê de parastina devkî dan Serokatiya Lijneya Disiplînê ya Sîncanê. Yagci di parastina xwe de got ku ev sepan derî aqil û wijdan e û ev tişt anî ziman: “Yek ji fezîleta mirovbûnê ya herî bingehîn jî ew e ku mirov xwedî li nirxên civakî derkeve. Yek ji van fezîletan jî civakîbûn û jiyana bi hev re ye. Silavdayîn û hev hembêzkirin yek ji nirxên bingehîn ên çandên Rojhilata Navîn, Anatoliya û Mezopotamyayê ne. Heta kesên silavê nedin baş nayên dîtin. Lewma jî hişyariya rêveberiya ya ‘silavê nedin ziyaretvanan’ tiştekî li dijî nirxên exlaqî ye. Min berpirsyariya xwe ya exlaqî û wijdanî pêk anî û silav da. Dê vê silavdayînê jî bidomînim. Em van sepanên derî aqil ên rêveberiyê qebûl nakin.”&nbsp;

	&nbsp;

	AKAT: EZ PARASTINÊ RED DIKIM

	&nbsp;

	Siyasetmedar Ayla Akat Ata jî di parastina xwe de got ku di fikraya duyemîn a xala yekemîn a Qanûna Înfazê ya hejmar 5257’an de bi vekirî tê gotin ku ‘Divê sepanên girtîgehê li dijî rûmeta mirovahiyê û zalimane nebin’ û wiha domand: “Weke hiqûqnasekî ez girteke bi vî awayî derheqê min de hatiye amadekirin û parastinê red dikim. Silavdayîna xizmên hevalên xwe, maçîkirina destên dayikên wan û di dawiya hevdîtinê jî gotina ‘oxir be’ tiştekî mirovî ye. Weke mirovekî min jî ev berpirsyariya xwe bi cih anî.”

	&nbsp;

	Piştî parastinê jî Serokatiya Lijneya Disiplînê cezayê “du mehan nikarin tev li çalakiyên çandî û werzîşê bibin” da siyasetmedaran. Têkildarî cezayên disiplînê jî Ata û Yagci li Dadgeriya Înfazê ya Rojava a Enqereyê îtîraz kirin.&nbsp;

	&nbsp;