Komeleya Rosa ji bo betalkirina fesixkirina Peymana Stenbolê doz vekir  

2021-05-18 10:22:37


	 

	AMED - Komeleya Jinan a Rosayê ji bo biryara fesixkirina Peymana Stenbolê were betalkirin, li Şûreya Dewletê doz vekir. 

	 

	Peymana Stenbolê ku jinan ji kuştin û tundiyê diparêze di meha adarê de bi biryarnameya Serokkomarê AKP’yî Tayyîp Erdogan hatibû fesixkirin. Nerazîbûn û xwepêşandanên jinan ên li dijî fesixkirina peymanê berdewam dikin. 

	 

	Komeleya Jinan a Rosa ji bo betalkirina fesixkirina Peymana Stenbolê serî li Şûreya Dewletê (Daniştay) da û doz vekir. Komeleyê daxwazname da Şûreya Dewletê û di daxwaznameyê de destnîşan kir ku fesixkirina peymanê li dijî dewleta hiqûqê ye û ji bo mafê mirovî yên jinan were parastin ew dixwazin biryar were fesixkirin. Komeleyê di daxwaznameya xwe de diyar kir ku biryara fesixkirinê li dijî Destûra Bingehîn e û xwest birêvebirina biryarê were sekinandin.