ÎZMÎR - Şaxa ÎHD’a Îzmîrê daxuyand ku li girtîgehên herêma Egeyê di salek dawî de 785 binpêkirinên mafan qewimîne.
Şaxa Komeleya Mafên Mirovan (ÎHD) a Îzmîrê “Rapora Binpêkirina Mafan a Girtîgehên Herêma Egeyê ya 2022’yan” bi civînek çapemeniyê li avahiya xwe eşkere kir. ÎHD’ê diyar kir ku rapor aydî binpêkirinên mafan ên li girtîgehên Şakran, Kiriklar, Menemen, Odemîş ên Îzmîrê, girtîgehên Bandirma, Burhaniye, Kepsûn ên Balikesîrê, girtîgeha Akhîsara Manîsayê, girtîgeha Denîzlî ya Tîpa T’yê, girtîgeha Bodrûmê ye. ÎHD’ê da zanîn ku di encama serlêdana malbatên girtiyan û parêzeran de rapor hatiye amadekirin.
BINPÊKIRIN
Hevserokê ÎHD’a Îzmîrê Zafer Încîn raporê xwend û diyar kir ku mafên girtiyan ên jiyanê tune tê hesibandin û wiha got: “Li girtîgehên herêma Egeyê herî zêde di warê xizmeta tenduristiyê, sepana tecrîdê, taloqkirina cezayan û serbestiya bikontrol, astengkirina faliyetên civakî, mafê sporê, astengkirina mafên tenduristî û xwarinê, pirtûk, rojname, name, ragihandinê astengî û qedexe hene.”
SEPANA TECRÎDÊ
Încîn diyar kir ku demek dirêje li Girtîgeha Îmraliyê polîtîkaya tecrîda girankirî û îzolasyonê tê sepandin û got: “Li girtîgehên herêma me jî ev tecrîd bi awayên cihê tê sepandin. Li gelek girîgehan tecrîd wek rêbazek cezkakirinê di dewrê de ye.”
ŞANDINA PEREYAN DIBE SÛC!
Încîn di berdewamiya raporê de da zanîn ku xwarinên li girtîgehan ne bi dilê girtiyan in, li qawîşan hejmara ragirtinê zêde ye, ev jî dibe sedemê ku tenduristiya girtiyan nebaş bibe û her wiha girtî sewqî girtîgehên dûr ên ji malbatê xwe tên kirin û ev jî berdewamiya polîtîkaya cezakirinê ye. Încîn anî ziman ku krîza aborî bandorê li ser girtiyan jî dike û her tişt hatiye bihakirin û heqê wan ji girtiyan tê girtin û malbatên ku pere ji girtiyên xwe re jî dişînin bi şandina pereyan tên sûcdarkirin.
GIRTIYÊN NEXWEŞ
Încîn destnîşan kir ku li girtîgehan bi taybetî girtiyên nexweş nayên tedawîkirin û got: “Dema girtiyan dibin nexweşxaneyê sepanên lêgerîna nav dev, lêerîna tazî li ser wan tên sepandin.”
785 BINPÊKIRIN
Încîn di mijarên navborî yên binpêkirinên mafan de ku diqewimin xal bi xal anî ziman û destnîşan kir ku din nava salek dawî de li dijî girtî û hikûmxaran bi giştî 785 binpêkirinên mafan qewimîne.