'Miduriyeta Ewlehiyê ya Hewlerê gefa kuştinê li Mazlûm Dag dixwin'     

2020-05-03 12:50:35


	 

	NAVENDA NÛÇEYAN - Malbatên Mazlûm Dag û Mihemed Beşîksiz, diyar kirin ku rayedarên ewlehiyê yên Hewlerê gefa kuştinê li zarokên wan xwarine. 

	 

	Malbatên Dag û Beşîksiz diyar kirin ku li Midûriyeta Giştî ya Emniyetê ya Hewlêrê gefa kuştinê li zarokên wan Mazlûm Dag û Mihemed Beşîksiz hatiye xwarin. Dag û Beşîksîz têkilî çalakiya 17'ê Temûza 2019'an a li Hewlêrê ya Başûrê Kurdistanê hatibûn girtin û di çalakiyê de endamê MÎT'ê ya Tirk a Osman Kose û Nêrîman Osman û Beşdar Remezan hatibûne kuştin. Dag û Beşîksiz bi rêya telefonê bi malbatên xwe re axivîn û binpêkirinên mafan û gefên li ser xwevegotin. Malbatan diyar kirin li dijî binpêkirina mafan û gefên ku li wan têne xwarin zarokên wan beriya niha çalakiya greva birçîbûnê kiribûn, piştî hevdîtina li gel rayedaran, li ser soza ku wê zext û zordarî û gefên li ser wan bi dawî bibin dawî li çalakiya xwe anîbûn.

	 

	'îŞKENCEYÊ LI WAN DIKIN'

	 

	Malbatan diyar kirin piştî ku çalakî hate bidawîkirin binpêkirina mafan zêdetir bûye, Dag û Beşîksiz kirine hicreyên yek kesî, êşkence li ser zarokên wan dikin û derb li wan dane. Malbatan gotin, rayedarên emniyetê ji zarokên wan re gotine, "PKK dijminê me ye, hûn jî êsîrê me ne. Em ê we li vir bikujin û haya kesî jî wê jê çênebe" û wiha gef li zarokên wan xwarine.

	 

	PIŞTÎ ZÎNÎ WERTÊ ZEXT ZÊDETIR BÛNE

	 

	Malbatan her wiha diyar kirin piştî êrîşa li ser Zînî Wertê bi dijminatî êrîşê dibine ser zarokên wan, rojê tenê ji bo 2-3 deqeyan dikarin biçine lawaboyê, nahêlin ku zarokên wan li televizyonê binerin, pirtûk û radyoyê nadine wan.

	 

	MALBATAN BANG KIRIN

	 

	Malbatan diyar kirin ku zarokên wan beriya niha çalakiya grêva birçîbûnê kiribûn û heke ev binpêkirin wiha bidomin zarokên wan diyar kirine ew ê dest bi rojiya mirinê bikin û gotin, "Divê Kurd li bara vê rewşê bêdeng nemînin. Ev helwesta Rêveberiya Herêmî ya Federal a Kurdistanê nayê qebûlkirin. Divê Kurd helwesta xwe nîşan bidin."