Li Colemêrgê nobeta li dijî qeyûm dest pê kir 

2024-06-26 23:09:32


	 

	COLEMÊRG – Şandeya DEM Partiyê ya ji endamên hilbijartî yên ji Wan û Agiriyê pêk tê, li dijî desteserkirina îradeyê li Colemêrgê çalakiya nobetê hate destpêkirin.

	 

	Li dijî tayînkirina qeyûm ya li Şaredariya Colemêrgê ku di bin rêveberiya Partiya Wekhevî û Demokrasiyê ya Gelan (DEM Partiyê) de ye, li bajêr çalakiya nobetê hate destpêkirin. Di 25’ê Hezîranê de heyetek ji hevşaredar û endamên meclîsên hatine hilbijartin ên navçeyên Payîzava (Gürpınar), Elbak (Başkale) û navçeya Avkevir (Taşlıçay) ya Agiriyê pêk dihat tevlî çalakiyê bû. Şandeyê duh bi daxuyaniyekê ragihand ku wê nobetê bigirin û li qada li ber Bazara Gel a Şaredariyê ya li navenda bajêr dest bi nobetê kirin. Li qada ku çalakî lê hat lidarxistin pankartên "Em ê tecrîdê bişkînin em ê qeyûm bişînin", "Ne qeyûm, ne tecrîd, ji gelê kurd re azadî", "Şaredarî yên me ne, em destûrê nadin desteserkirinê" û "Ji vînê re rêz bigirin" hatin daliqandin.

	 

	Parlamenterê DEM Partiyê yê Colemêrgê Onûr Duşunmez û gelek endamên partiyê jî piştgirî dan hilbijartiyên ji bajar û navçeyên derdorê yên beşdarî nobedê bûn. Welatiyan di çalakiyê de bi stranên kurdî coşa nobetê zêde kirin. Ji aliyê din ve hat hînbûn ku nobeda çalakiya ku hatiye destpêkirin wê her roj bidome.